Kum shi bynta ban kynmaw burom ia ka sngi kyrpang ki khynnah kynthei ba la rakhe ha shi tyllup ka pyrthei, ka District Hub For Empowerment of Women jong ka Ri Bhoi mynta ka sngi ka la rakhe kyrpang ia ka sngi ki khynnah kynthei ba la tip kum ka ‘International Day of the Girl Child’ ha kaba la pynlong ha IVCS Umdihar ha Ri Bhoi District.
Ka phang jong une u snem ban rakhe ia kane ka sngi kyrpag ki khynnah kynthei ka dei ka ka phang halor kata kaba la tip ha ka ktien nongwei, ‘ Girl’s Vision for the future’.
U Deputy Commandant ka 6th Battalion, u Bah Orville Isaac Massar u la wan ban shim bynta kum u kongsan ban rakhe kyrpang ia kane ka sngi bad la sakhi lang ruh da ka jingdon lang ka Kong F.N Sun, District Social Welfare Officer, ka Kong S.M Bang, District Programme Officer ka Ri Bhoi, Ka Debrorah Rapsang, kaba la wan ban mihkhmat na ka District Hub For empowerment of women bad kynthup ruh ki longkmie, ki khynnah bad ki samla na kiwei kiwei ki shnong.
Kum u kongsan jong kane ka sngi, u Bah Massar haba kren halor kane ka sngi kyrpang ki khynnah kynthei, u la kham ban khia halor ka jingdonkam ban don kum kine ki prorkam na ka bynta ban ai ka jinghikai kaba kyrpang ia ki samla bad ha kawei ka bynta ruh u la pynshlur ia ki kmie ki kpa ba ki dei ban long kita ki nongkyrshan bad ban ai mynsiem ia ki khun kynthei khnang ba kin lait na shibun ki jingpynshoi bad ki jingsniew kiba ap ha ka jingim jongki.
Ha kawei ka bynta, u la ban khia ruh ha kane ka juk kaba mynta bun sa tang ki jingpynshoi bad kum ki samla pat ki hap ban nang ban jied ia ki paralok, namar dei ha ki paralok kin bha bad dei ruh ha ki paralok kin jot ka jingim. Kumta u la kyntu jur naduh ki kmie ki kpa ba kin don lang ia kata ka jingiasngewthuh jingmut hapeng ki khun, namar ban tei ia ka lawei ba phyrnai ki khun donkam ka jingkitkhlieh na laiang la sem, u la bynrap.
