Nongpoh, Jymmang 06: Kum kawei na ka thong ban ïalam lynti ne ban pynkhlaiñ bor ïa ki khun samla ba kin tip ban jam sha ka jingjop jong ka jingim, ka Seng Samla & Cultural Sports Club ka shnong Syadrit ha ryngkat ka jingïatrei lang bad ka University of Science & Technology Meghalaya (USTM), mynta ka sngi ki la pynlong da ka prokram ai jinghikai ne kata ka Carrier Guidance ha ka ktien nongwei ha CFC Balawan Hall, Umsning.
Ha kane ka prokam la wan shim bynta da u MP ka Shillong, u Dr. Ricky A.J Syngkon kum u kongsan bad u MLA ka Umsning u Dr. Celestine Lyngdoh bad u MDC ka Umsning u Bah Banrikus Nongsteng kum ki symbut kongsan. Ha kane ka sngi la don lang ruh u Chancellor ka USTM u Mahbulbul Hogue, ki khynnah skul na ki skul bapher bapher bad ki nonghikai.
Kane ka prokram ka ai jinghikai kyrpang ïa ki khynnah ba kin tip kumno ban jied ïa ki jingpule sha ki kyrdan kiba shaneng ba kin poi sha kata ka thong jong ka jingim. Ka jingdon jong ki skul pule ha kaba ki hap ban pyntreikam katkum ak National Education Policy bad kiwei kiwei ki bynta ban tei ïa ka lawei jong ki khun samla.
Haba kren ha kane ka sngi, naduh u Dr. Ricky A.J Syngkon, u Dr. Celestine Lyngdoh, u Bah Banricus Nongsteng bad Mahbulbul Hogue, ki la pynpaw ba ka long kaba donakam ban don kum kine ki jaid prokram ban ailad ïa ki khynnah skul ne ki samla pule ba kin tip ïa kata ka jingïaid lynti ban poi sha ka thong jong ka jingim.
Ki kyntien ai mynsiem da kitei ki nongkren ka long ba ym don kano kano ka jingeh ban poi sha ka thong jong ka jingim bad dei tang lada ki samla ki don ïa kata ka thong ban pyntrei shitom na ka bynta ban pynurlong ïa ka jingjied jongki ban poi sha ka thong kaba ki angnud kumba ki la jied ne angnud ha ka jingim.
Shuh shuh, ki kyntien kiba ai mynsiem ka long ba ym don kano kano kaba ki samla kin nym lah ban leh bad lada ki don kata ka mon ban trei shitom kin poi beit sha kata ka thong, namar dei tang ka jingtrei shitom bad ka jinglen lade kaba kyntiew ïa ki ban poi sha kata ka thong kaba ki angnud.
