Nongpoh, Lber 05: Kum uwei na u Samla Rangbah ba la paw ha ka jylla bad uba dei ruh na ka kynhun ki nongthoh Khubor ha ka jylla, u bah Kyrmen Uriah mynta ka sngi u la lum la long ia ki Nongri syiar bad kumjuh ruh ki nongkhaïi na ka bynta ban ia thir halor ka jingeh ba ki ia kynduh kum kita ki nongri syiar bad ki nongkhaïi syiar ha ka jylla.
Ia kane ka jingialang la pynlong ha Dorbar Hall, Umsning Nongthymmai, ban ia pynbeit ia ki jingeh kiba la mih hapdeng ka Meghalaya Poultry Farmers and Welfare Association bad ka Meghalaya Poultry Suppliers and Retailers Association.
Ha kane ka jingialang, la ai lad ia ki dkhot jong ki ar kynhun ban pynpaw ia ka jingsngew jongki, halor ka jingeh kaba ki ia kynduh ha ka kam ri syiar bad ruh kum kita ki nongkhaïi syiar.
Kumba la pynpaw da ka nongialam ka Meghalaya Poultry Farmers and Welfare Association, u Bah Daminot Sylliang bad u President ka Meghalaya Poultry Suppliers and Retailers Association, u Bah Everest Mylliemumlong, ki la ong ba ka jingthmu kane ka jingiakynduh lang ka long ban ia tai halor ki jingeh ba ki ia kynduh ha ka kam ri syiar bad ruh ha ka kam khaïi syiar na ka jingshah khñiot dor ha iew ha hat.
Shuh shuh ki la pynpaw ruh ba nangne shakhamt kine ki ar kynhun kata ki nongri syiar bad ki nongkhaïi syiar kin ia trei ryngkat bad kin ia peit ia khmih na ka bynta ka jingiabha lang bad ruh ka jingia myntoi lang naduh ki nongri syiar bad ruh ki nongkhaïi syiar.
