Nongpoh, Naiwieng 29: Ka seng Ri Bhoi Peoples Council (RBPC), Nongpoh Circle mynta ka sngi ka la leit ban jurip ia ka jaka bret niut kaba don ha ka shong Umshangling, kaba dei halor ka jingud jingnam ki paidbah na ka jingktah jong ka jingsma iwtung, kaba dei ruh na ka jingbret pathar ia ki jaboh jabain ha katei ka shnong.
Ha kane ka jingleit jurip la ialam da u Bah Mission Tron, President ka RBPC Nongpoh Circle ha ka jingdon lang u Bah Vincent Sohkhwai, Secretary shnong ka shnong Umshangling, u Bah Nicholas Buhphang Assistant Secretary Shnong ka Shnong Umshangling bad ryngkat ka jingdon lang kiwei ki dkhot ka RBPC Nongpoh Circle.
Haba leit ban jurip ia katei ka jaka theh niut ka sor Nongpoh, ki nongnialam ka RBPC ki la lap ia ka jingbret pathar ia ki jaboh ka la ktah ia ka koit ka khiah ki nongshong shnong bad ruh ka sorkar haduh mynta kam pat lah ban pyntreikam ia ka Solid Waste Management kaba la sdang naduh u snem 2019. Ka seng ka la lap ruh ba ka jingdon kitei ki kor ki bor ki la jot bad la sarang bad lada ym lah ban pyntreikam kam don jingmut ban leit buh ia kitei ki kor ki bor kumba la lap da ka seng.
Hadien ka jingjurip, u President ka RBPC Nongpoh Circle u Bah Mission Tron, u la pynpaw ia ka jingsngewkhia kaba jur halor ka jingbret pathar ia ki jaboh na ka sor Nongpoh bad ka seng ka la kyntu ia ka sorkar bad ia ki nongmihkhmat ba ki dei ban shim khia halor kane ka kam kaba ktah ia ka koit ka khiah ki paidbah jong katei ka shnong.
U la ong ruh ba ka pynpaw ia ka jingsngewkhia halor ka daw ba ka jingbret pathar ia ki jaboh ka ktah ym tang tang ia ka jingkoit jingkhiah ki paidbah bad kumba la sakhi la iohi ba ka long kaba jynjar wat tang ban ring mynsiem ruh na ka daw ka jingmih ka lyer kaba sma iwtung na ka jingbret pathar ia ki jaboh ha katei jaka, u la ong.
Shuh shuh, u la bynrap ruh kumba ka sorkar ka la wan rah da ka Solid Waste Management ban pyntreikam na ka bynta ban leh ha kata ka rukom katkum ka juk stad ba mynta ba kan nym ktah ia ka koit ka khiah ki paidbah, ka seng ka kyntu jur ia ka sorkar jylla ba ka dei ban pyntreikam ia katei ka solid Waste Mangement bad lada ka sorkar kam lah ban pyntreikam ia ka rukom bret jaboh kaba ym ktah ia ki paidbah ka seng kam banse ban iaid da kawei ka lynti ha kaba katei ka jingbret pathar ia ki jaboh ka la ktah shisha ia ka koit ka khiah ki paidbah nongshong shnong, u la bynrap.
