Nongpoh, K’lyngkot 18: Ki nongshong shnong ka Shnong Lamalong na Ri Bhoi District, kiba dei ban ioh jingmyntoi na ka skhim Pradhan Mantri Krishi Sinchayee Yojana (WDC-PMKSY 2.0) hynnin ka sngi Thohdieng ki la leit ban ia kynduh syndon ia u Deputy Commissioner ka Ri Bhoi, u Abhilash Baranwal ban aiti syndon da ka shithi ujor ban dawa tohkit halor ka jingkynnoh ba pyndonkam bakla ia katei ka skhim ba ki nongioh jingmyntoi kim shym la ioh jingmyntoi satia kumba la mang da ka sorkar.
Ha kane ka sngi, kitei ki nongshong shnong kiba dei ban ioh jingmyntoi na katei ka skhim ki la tur sha ka ophis u Deputy Commissioner bad ki la ioh lad ruh ban ia kynduh ia u Deputy Commisioner ban ujor halor kane ka jingpyndonkam bakla ia katei ka skhim ha katei ka shnong ba la kynnoh ba kito kiba dei ban ioh jingmyntoi kim shym la ioh jingmyntoi satia.
Haba kren sha ki lad pathai khubor, Kitei ki nongshong shnong, ki la iathuh ba ki la tip halor kane ka jingpyndonkam bakla ia katei ka skhim, ka dei hadien ba la don kiba ujor da ka RTI bad ki la ioh jingtip ruh ba la dep ban sei ia ka pisa haduh T. 1.41 klur, katba ki nongioh jingmyntoi pat kim ioh satia kumba la mang da ka sorkar.
Ki la iathuh ruh ba kane ka skhim ka dei ka skhim kaba ka sorkar kmie ka iarap na ka bynta ki nongrep ban kyntiew ia ka kam rep ka kam riang, ka jaka tan um, ki tiar ki tar ban rep ban riang, ki kam thain ksai bad kiwei kiwei, bad kaba ki nongshong shnong pat ki la kynnoh ba ka don ka jingpyndonkam bakla ne bam sap ia kane ka skhim.
Shuh shuh, kitei ki nongshong shnong, ki la ong ba ki khmih lynti ba u Deputy Commissioner ka Ri Bhoi un shim khia ia kane ka kam ban tohkit na ka tnad treikam bad na katei ka Watershed Committee bad lada u Deputy Commissioner um shim khia kim banse ban iaid da kawei ka lynti wat ban tur ruh sha Secretariat ban dawa ia la ka hok, ki la bynrap.
Haba kren sha ki lad pathai khubor, halor kane ka jingshah kynnoh pyndonkam bakla ia katei ka skhim, u Deputy Commissioner ka Ri Bhoi, u Abhilash Baranwal, u la iathuh ba la don ki nonghsong shnong kiba wan ban ujor sha ka ophis jong u, ba ka don ka jingbym ia hap ia ka jingioh jingmyntoi bad ka pisa kaba ki dei ban ioh bad kum u khliehduh ka District u la kular ruh ban shim khia ia kane ka kam, wat lada dei ban tohkit ne thung da ka kynhun tohkit ban lap ia ka jingshisha kumba la kynnoh da kitei ki nongshong shnong ne ki nongioh jingmyntoi lyngba katei ka skhim.
