Nongpoh, Jylliew 20: Uwei na u samla ka dong Ri Bhoi, u Samla Albert Maring na ka Shnong Umdapdumu, u la pynpaw ia ka jingsngewkhia halor ka jinglong jingman jong ka kam saiñ hima sima hapoh ka jylla, ha kaba u la kynnoh ba kat dang mih ki sngi ka la dang hiar bad ki paidbah kim don shuh ia kata ka sur ha kaba la shu synshar tang da kita ki riew khraw kiba don hapoh ka sorkar.
Haba kren sha ki lad pathai khubor, u la ong ba ha ki sorkar ba la leit noh hapoh ka jylla ka dang don kata ka synshar paidbah ba ki paidbah ki ioh bynta lang la ha ki kam ki jam, ki kam pynroi bad kiwei kiwei ki jingioh jingmyntoi, hynrei naduh ba wan ka sorkar MDA ba la lamkhmat da ka NPP ha u snem 2018 ka jinglong jingman hapoh ka jylla ka la kylla khongpong bad kiba ioh jingmyntoi ki dei tang kito kiba don hapoh kane ka sorkar.
U la pynpaw ruh kawei na kaba la paw pyrthei ka dei ka jingdon kita ki ‘High Level’ ba ia kino kino ki kam la bat bor da kita ki High Level la ka long ha ki kam pynroi, ki kam khaii pateng, ki kam Contract ne ha ka liang ka ioh ka kam ka ioh jam bad kiba ioh jingmyntoi ki dei tang kita kiba don ha kata ka High Level.
U la kynthoh ruh ia kino kino ki kam la shu bat bor da kita ki High Level, la ka long ha ka thungkam thungjam, ki kam Contract bad ki kam pynroi bad kito kiba don hapoh ka sorkar MDA ki ioh bun ia ki jingmyntoi bad katba kito kiba don sha ka liang pyrshah kim ioh satia ia kita ki jingdonkam ba dei ban myntoi u paidbah ha kaba la paw shai tang kito kiba don ha ka bor ki ioh jingmyntoi.
U la ong ruh lada long ha kane ka rukom ki paidbah kin iap bad kin shah ktah ha baroh ki liang bad kiba ioh jingmyntoi ki dei tang kito kiba don ha ka bor, namar kane ka paw shai ba ka jinglong jingman ka kam sain hima sima ka dei kaba la shu wad burom, ia knieh shuki bad shu ia wad bor bad ha kaba khatduh kin shah ktha ki paidbah bad ba ka jylla kan dang hiar arsut ha ka roi ka par ba ki paidbah ki dei ban ioh jingmyntoi.
Shuh shuh, u la ong ruh ba katkum ka synshar paidbah (Democracy) kam dei ban don ka jingiapher ne noh shiliang khmat la kiba don ha ka bor ne kiba don ha ka liang pyrshah bad kum kiti ki nongialam ne ki myntri sorkar ki dei ban tip bad ban sngewthuh ym ban ia wad bor ne wad burom, hynrei ka kam ran jongki, ka dei ban leh solarsar khlem da noh shiliang khnang ban lah ban kyntiew ia ka roi ka par ki paidbah ha baroh ki liang hapoh ka jylla, u la bynrap.
KREN BYNÑIAW U SAMLA NA RI BHOI HALOR KA JINGLONG JINGMAN KAM SAIÑ PYRTHEI HA KA JYLLA
