Nongpoh, Naiwieng 24: U Nongialam ba rangbah ka seng RBYF u Bah Bipul Thangkhiew haba leit ban pynskhem ia ki nongialam ba thymmai ka RBYF Western Zone, u la kyntu ba nalor kiwei ki ki kam ba hap ban shakri ia ki paidbah ka thain Ri Bhoi Sepngi, u la kyntu jur ruh ia kitei ki nongialam ba thymmai ba kin buddien ia ka rukom treikam ka Civil Sub Division Patharkhmah, ba ka jingdon katei ka ophis treikam ka dei ban long kaba ai jingmyntoi ia ki paidbah katei ka thain ha Ri Bhoi District.
U Bah Bipul Thangkhiew u la pynpaw ia kitei ki kyntien ban buddien ia ki kam shakri ha ka liang ki kam pynroi, ka dei ha ka jingialang pynskhem ia ki nongialam ba thymmai ka RBYF Western Zone kaba la long ha ka sngi Saitjain ha Iing Dorbar Hall, Patharkhmah, ba la la don ryngkat ruh naduh u Bah R.J Thangkhiew, Political Secretary, u Bah Phrang Kylla, Organizing Secretary, u Ba Liander Nongshli, Working President, u Bah Alvis Kharbani, Transport Secretary bad kynthup kiwei kiwei ki nongialam na ka seng kmie.
Kum ban pynkynmaw, ka Ri Bhoi sepngi dang shen ka la ioh ia ka Civil Sub Division ba la wan rah da ka sorkar jylla, da ka jingthmu ban pynsuk ia ki paidbah ha ki kam ai jingmyntoi bad ki kam shakri ia ki kam jong ki paidbah bad dei halor kane ka nongrim u heh nongialam ka RBYF u Bah Bipul Thangkhiew u la ban khia ba ka jingdon katei ka Civil Sub Division kam dei ban long tang ka jingpyrsyrwa ia ka pisa u paidbah bad ka dei ban ai jingmyntoi ha kaba pyntreikam ia ki kam pynroi bad ki kam shakri kiba u paidbah u donkam ha katei ka thain Ri Bhoi Sepngi.
Ha kawei ka bynta, u la kyntu ruh ia kine ki nongialam ba thymmai ym tang ban buddien ia ki jingtreikam katei ka Civil Sub Division, hynrei ba kin shim khia ruh ban trei na ka bynta ban wan rah ia ka bha ka miat bad ka roi ka par jong ki shnong ki thaw bad ruh ban wan rah ia ka shongsuk shongsain ki paidbah ha katei ka thain, ba bun ki shnong ki don ha khappud ka jylla Assam.
Ki nongialam ba thymmai ka RBYF Western Zone ba la pynskhem da u President ba rangbah ka seng RBYF u Bah Bipul Thangkhiew ha katei ka sngi, ki kynthup ia u President ba la jied ia u Bah Rishan Nongtri kum u President, u Samla Tony Lyngdoh General Secretary bad kynthup kiwei kiwei ki nongialam jong kane ka Zone, kaba dei kawei na ka shnat treikam jong ka seng RBYF Sengkmie ha Ri Bhoi District.
