Nongpoh, Naiwieng 26: Ki nongialam shnong ka shnong Belahari ba hap ha ka Hima Nongkhlaw mynta ka sngi ha ka Executive Committee ba la pynlong ha katei ka Shnong, ki la pynshai ba ka shnong kam pat shym la beh shnong ia ka Kong Morias Rani, hynrei ka bor shnong ka la sospon kum ka nongshong shnong, kaba dei halor ka nongrim ba ka ialeh pyrshah ia ka Dorbar Shnong.
Kumba la pynpaw, kane ka huri hura ka la mih ha katei ka shnong, ka dei halor ki kam ialeh pyrshah katei ka Longkmie ban register tuh ia ka khlaw shnong, ban khang ia ki kam pynroi hapoh ka shnong bad ruh ka ju uor sha ka tnad Forest bad ki Pulit ka Assam haba ka shnong ka leh ia kino kino ki kam pynroi khamtam ha kaba shna surok bad kiwei kiwei ki kam pynroi hapoh ka shnong.
Haba kren sha ki lad pathia khubor, ki nongialam shnong naduh u rangbah shnong, u Bah Peter stone Syngkli, u Secretary Shnong u Bah Khrawpyrkhat Rani, u rangbah shnong barim u Bah Active Pator, ki la pynshai ba ha ka jingshisha ka Dorbar shnong kam pat shim ia ka rai ban beh shnong ia ka Kong Morias Rani, hynrei ka shnong ka la shu sospon bad ai por haduh 5 sngi ba kan ia kren iasuk bad ka shnong bad lada ka dang ialeh pyrshah ia ka shnong na ka liang ka shnong kam banse ban shim pat da kiwei ki lad kiba tyngeh.
Kae ka jingpynshai kitei ki nongialam shnong, ka dei hadien ka jingmih ha ki lad pathai khubor ba la beh shnong ia ka Kong Morias Rani bad ha ka jingshisha kane ka dei tang ka jingkhluid ki paidbah ba ki la kwah ban beh shnong noh halor ki kam ialeh pyrshah ia ka shnong hi ka dang ap haduh ka 29 tarik u Naiweing 2024, ha kaba lada kam wan ban ia kren sha ka bor shnong kin sa shim pat da kiwei ki lad ba tyngeh ban pyntip ruh wat sha u Syiem ka Hima Nongkhaw.
Kitei ki nongialam shnong ki la pynshai ruh, kane ka kam ka la sdang naduh u snem 2011 ba ka Kong Morias Rani ka la leh tuh ban ioh NOC na ka shnong bad na ka Hima Nongkhlaw, ha kaba kiwei kiba leh ia kane kajuh ka kam ki la kohnguh ia ka jingpyniaid jong ka shnong ba katei ka khlaw kam dei ka nongkynti jongno jongno bad ka dei ka khlaw shnong, hynrei kane ka Morias Rani pat ka ialeh pyrshah kaba la pynlong ia ki nongshong shnong ban bitar bad ban ialeh pyrshah ia ka kum ka Longkmie na katei ka shnong.
Shuh shuh, ki la pynpaw ruh ba ki paidbah nongshong shnong ki ialeh pyrshah ia kane ka Longkmie ka dei ruh ba katei ka jaka ne ka khlaw ka dei kaba hap ha ka shnong Belahari ha ka jylla Meghalaya, hynrei ka ju ialeh pyrshah da kaba ujor sha ka tnad Forest bad sha ki Pulit na Assam ha kaba lada ki leh ia kano kano kam pynroi ha shnong ha thaw ki shah pynthud pynban ha ki bor ba dei peit ka tnad forest bad ki Pulit na Assam.
