Nongpoh, Jylliew 25: Kum kawei na ka kynhun treimon sngewbha ha ka them Ri Bhoi District, ka Ribhoi Area Welfare Association (RAWA) mynta ka sngi ka la phai khmat kyrpang sha ki riew tymmen bad ruh sha kito kiba don ka jingduna ha ka dkhot met ban sam da ki tiar sha ki 147 ngut kiba kynthup ïa ki riew tymmen ba la kot 65 snem ka rta bad sha kito kiba don ka jingduna ha ka dkhot met.
Ïa kane ka jingsam ïa kitei ki tiar ban ïarap sha ki riew tymmen bad kiba don ka jingduna ha ka dkhot met la pynlong ha Umling C&RD Block bad la leh ïa kane ka kam kaba bha da ka jingkyrshan lang ka Artificial Limbs Manufacturing Corporation of India (ALIMCO) bad ka Pradhan Mantri Divyasha Kendra (PMDK) – Shillong.
Na ki 147 ngut ba la sam ïa kitei ki tiar, 30 ngut ki dei ki ba don ïa ki jingduna ha ki dkhot met bad 117 ngut kidei ki riew tymmen kiba la kynjoh sha ka 65 snem ka rta.
Ïa kitei ki tiar naka bynta ki riew tymmen la sam ïaki tiar lyngba ka Skim RVY bad ïaki tiar naka bynta ki ba duna haki dkhot met la sam lyngba ka skim ADIP bad ha kane ka sngi la sakhi ruh ba 2 ngut ki rangbah ki bym lah ban ïaid ki la ïoh ban pdiang ïaka tricycle kaba la long shisha ka jingkyrkhu kaba khraw ha kaba nangne shakhmat kin ïoh ban leit ban wan khlem kano kano ka jingeh jing jynjar.
Ïa katei ka Program sam ïa ki tiar jingïarap sha ki riew tymmen bad kito kiba don ka jingduna ha ka dkhot met la ïalam daka kong Balakyntiew Umbah kum ka President ka Ribhoi Area Welfare Association bad la sakhi lang ruh daka jing wan ban ïa shim bynta ka District Social Welfare Ophisar ka kong NF Sun lem bad kiwei kiwei.
