Nongpoh, Naiwieng 11: Nalor ka kam kaba ki shakri ha ka leit ka wan ki paidbah kum kita ki dribar Auto Rickshaw ha ka thain Nongpoh, ki nongialam ka Nongpoh Region Auto Owner & Driver Association (NRAO&DA), Ribhoi District mynta ka sngi ki la leit ban ia kynduh ia u Rangbah Shnong Nongpoh na ka bynta ban aiti ia ki Dusbin ban buh ha ki jaka paidbah na ka bynta ban wan rah ia ka khuid ka suba ha ka sor Nongpoh.
Ha kaen ka step, ki nongialam katei ka kynhun ha ryngkat u rangbah shnong bad ki nongialam shnong ki la leit ban buh ia ki dusbin ha ki jaka paidbah ha sor Nongpoh, kaba long shi bynta ban wan rah ia ka khuid ka suba ha ka thain Nongpoh.
Hadien kane ka jingbuh ia ki tin thep niut, ki nongialam ka NRAO&DA ki la leit ruh ban ia kynduh ia u Deputy Commissioner ka Ribhoi u Ahilash Baranwal, na ka bynta ban pynithuh ba ki la dep ban pynbiang lut iaki kot ki sla jong ka Association bad ha kajuh ka por ka seng ka ai khublei ruh halor ka jinglongkloi ka Ophis u DC ban ia trei ryngkat bad ka Association.
Haba kren sha ki lad pathai khubor ki nongïalam jong katei ka kynhun kiba kynthup ïa u Bah Banasar Lyngdoh Nonglait President, Tony Shylla Vice President bad u bah Elianby Tynsong Education Secretary ki la pynpaw ïaka jingsngew skhem ba ki la ïoh ïaka jingithuh naka liang ka District Administration hakaba naka liang u Deputy Commissioner ka Ribhoi u la long uba kloi ban ai ïaka jingïatreilang.
Ha kawei pat ka bynta, kitei ki Nongïalam mar ïa ïoh ïaka jingithuh naka liang ka ophis u DC Ribhoi, ki la maham jur ïa u President Barim jong ki Nongñiah Auto u Bah Marcus Marten ba um dei shuh ban kam ïalade kum u President, namar ka por jong u lem bad ki dkhot kiba rim jong u ki la kut khlem da pynthymmai la bun tylli ki snem bad ha kajuh ka por ki la maham jur ruh ïa u Nonglum Khanja naki Nongñiah Auto ba u la dei ban sangeh shi syndon ïa katei ka kam khrong khajna namar katei ka kam lum pisa ka la long beaiñ naba kapor jong ki ka la kut bad lada utei u nonglum khajna un dang bteng ban lum ka Association kan sa leh da kaba tyngeh.
Shuh shuh, ha kae ka snig, kitei ki nongialam ki la pynpaw ruh ba na ka liang ka ka Association ki long kloi ban ïa trei ryngkat lang ba kino ki tnad jong ka sorkar bad kumjuh ki dorbar shnong, khnang ba kin lah ban tehlakam ïaki kam sniew bad ha kajuh kapor ki la pynpaw ba kane ka sngi ka la long tang ka jingsdang ban pyntyllun iaki kam jong ka Association bad nangne sha khmat kin sa nangleh shibun ki kam ki ban wan rah iaka jingmyntoi naka bynta ki Nongñiah Auto bad kumjuh ïaki paidbah.
