Nongpoh, Jymmang 12: Ki bor ka tnad Civil Hospital Nongpoh mynta ka sngi, ki la pynlong da ka jingrakhe kaba kyrpang ban kynmaw burom ia ka jingshakri ba kordor jong ki Nos kaba la tip kum ka International Nurses Day 2025 halor ka phang pdeng Our Nurses, Our Future Caring for Nurses Strengthen Economies.
Ha kane ka jingrakhe kaba kyrpang, ba la pynlong ha ka conference hall jong ka Civil Hospital, la wan ban ia shimbynta da ka Dr. D. Blah Medical Superintendent kum ka kongsan, ha ka jingiadonlang ruh ka Kong Danilla T Sangma, Nursing Superintendent, ki Sister bad Brother Incharge, ki staff nurse ka Civil Hospital bad ki khynnah pule Nus ka GNM Nursing School, Pahamsyiem.
Hashwa ban sdang ka jingrakhe, la plie ia ka dur sahnam jong ka Florence Nightingale, kaba dei ka Nus kaba la shakri janai ia u paidbah bad kaba dei ruh ka nongshem ia ka Modern Nursing bad ruh ka jingthang ia ka sharak.
Haba kren ha kane ka programme, ka Dr. Blah ka la ai khublei kyrpang ia baroh ki staff nurse ymtang jong ka Civil Hospital hynrei ia baroh kiba shakri paidbah kum ki nos, kiba aiti met bad mynsiem ban shakri ia ki nongpang ha kylleng ki jaka sumar paidbah.
Ka la ong ruh, ba ka kam kum ki nos kam long shisha kaba suk hynrei dei ka jingaiti met bad mynsiem bad ka jinglen lade da ki nos, ki paidbah ki ioh shisha ia ki jingsumar kiba paka, ki paidbah ki shngain bad ki suk mynsiem haba ioh ia ki jingsumar lyngba ki nos, ka la kyntu ruh ba kum ki nos ki dei ban nang iai ai ka jingshakri kaba paka bad janai, ym tang ban trei tang dep ne tang ban shu ioh ia ka tulop, da kaba ki pyrkhat ba ki jied hi ia kane ka kam shakri paidbah.
Lyngba kane ka jingrakhe, la sam ruh ia ki khusnam sha ki nongjop bad nongiashimbynta ha ki programme bapher bapher ba la pynlong lyngba ka Nurse’s Week.
