Nongpoh, Risaw 21: Ka Ri Bhoi College kum ka jingpynshlur ia ki samla pule ha ka liang ka seng kam seng jam la jong, lyngba ka Entrepreneur Development Program Centre ka la sdang ia ka ‘Third Phase Entrepreneurship Development Program, kaba la sdang mynta ka sngi ka 21 tarik bad kan kut noh haduh ka 25 tarik u Risaw 2024.
Ia kane ka Entrepreneur Development Program la wan ban plie da ka Kong Balakyntiew Rani, Additional Deputy Commissioner ka Ri Bhoi kum ka kongsan ba la pynlong ha Conference Hall ka Ri Bhoi College bad la sakhi lang ruh da ka jingdon lang u Principal ka Ri Bhoi College u Prof. E.C Benny, ki profressor bad ryngkat ki samla pule.
Haba ai jingkren ha kane ka sngi, ka ADC ka Ri Bhoi District ka Kong Balakyntiew Rani ka la pynpaw ia ka mynsiem jong ka jingsngewkmen ba ka Ri Bhoi College ka la shim khia ban pynlong ia kum kine ki jaid prokram, kaba long ka thong ban ai jinghikai ia ki samla pule ba kin sngewthuh halor ka jingkordor jong ka jingseng kam seng jam lade ha kum kane ka pyrthei kyrduh kam kyrduh jam.
Shuh shuh, la kyntu ruh ia ka Ri Bhoi College ba kan dang pynbit pynbiang kham bha lyngba kane ka entrepreneur development program khnang lyngab ka jingdon kum kine ki jaid prokram kan ai jingmyntoi shisha ia bun ki samla pule hapoh ka College bad ka District hi baroh kawei.
