Nongpoh, K’lyngkot 21: Haba iasnohktilang bad ka jylla Meghalaya, kaba la rakhe kyrpang ia ka sngi ba ka la ïoh ia ka jylla ba pura kata ha u snem 1972, mynta ka sngi na ka liang ka Patharkhmah Civil Sub-Division, ka la rakhe ia kane ka sngi, da kaba pynlong ia ka prokram ba kyrpang ha phyllaw ka ophis treikam u BDO Jirang Block.
Ha katei ka sngi ba ka Patharkhmah Civil Sub-Division ka la pynlong ia katei ka jingrakhe Meghalaya Day, la sakhi da ka jingdon u Bah Sosthenes Sohtun, MLA Jirang, nangta ka Dr. Margaret Lyngdoh, Folklorist ka University of Tartu ha Ri Estonia, u Bah M.B Tongper, SDO ka Patharkhmah Civil Sub-Division, u Dr. P. Hajong, BDO ka Jirang C&RD Block, ki nongialam Hima, shnong lem bad kiwei.
Haba ai jingkren ha katei ka sngi, u Bah Sosthenes Sohtun, u la ai jingiaroh ia ka ophis Patharkhmah Civil Sub-Division, kiba la pynlong ia katei ka prokram bad ban rakhe kyrpang ia ka sngi ba ka Meghalaya, ka la ïoh ia la ka jong ka jylla kaba pura.
Shuh shuh, utei u MLA Jirang, u la ai jingiaroh ia ki nongialeh pynioh jylla ha kito ki snem kiba la leit noh baroh, ha kaba lyngba ka jinglen lade bad jingtrei shitom ka jongki, ka la pynlong ia ka jylla, ba kan ïoh la ka jong ka jylla.
Haba u kren pat halor ka Jirang Constituency, u Bah Sosthenes Sohtun, u la ong ba ka Ri Bhoi Sepngi, ka la kiew shibun eh haba iadei bad ki kam pynroi bad kita ki kam pynroi, ki la wan urlong ha kine ki khyndiat snem kiba la leit, kata naduh u snem 2018 shaneng, kaba dei ruh ka por ba ia ka sorkar jylla ialam da ka NPP, ha kaba la urlong ka surok na Umling sha Patharkhmah, ka surok na Baridua sha Umsen bad khamtam eh haba iadei bad ka Model Degree College ha Patharkhmah, ia kaba yn sa plie noh shen ha kine ki khyndiat sngi ban wan.
Namarkata, na ka liang utei u MLA Jirang, u la kyntu ia ki nongialam Hima bad nongialam shnong, ba kin iatrei ryngkat ryngkat, khnang ba ki kam pynroi kin nangwan shuh shuh ha ki shnong kiba hap ha Jirang Constituency, namar kum u MLA u angnud ka ka Jirang Constituency, ba kan long kum kata ka Model Constituency bad ba kan biang lut nadong shadong haba iadei bad ki kam pynroi.
