Ka Seng Khasi Students’ Union (KSU) West Khasi Hills District, kala kam ba ka sorkar Assam ha ka 11 tarik, Nailur, 2024 ka la wan sorjamin ia ki jaka ban tih surok ha ki thaiñ khappud kata na ka shnong Sohmarang, Jyrngam Syiemship, West Khasi Hills bad ia kane ka surok ki thmu ban pom lyngba ka Shnong Nongdronpara, Nongma, Nongmawlein, Nongsohram kiba dei ki shnong Khasi paka bad kiba hap hapoh ka West Khasi Hills District.
Halor kane ka bynta nanka liang jong ka KSU hapoh ka jingïalam u President bah John Fisher Nongsiang mynta ka sngi kila leit ban ïakynduh ïa u Deputy Commissioner ka WKHD u bah Garod LSN Dykes ban pynpaw ïa ka jingpyrshah bad phah turklar halor ka jingiai bteng jong ka sorkar Assam ban ban wanrah jubor ia ki project bapher bapher ha ki thaiñ khappud khlem da burom ïa ka status quo.
Ka KSU kala pynpaw ruh ba wat haba ka jingïakren ban pynbeit pud hapdeng ki ar sorkar jong ka Assam bad Meghalaya ka dang iaid khamtam ia ka Langpih Sector hynrei ka jingleh jong ka Assam ban thmu wanrah jubor ia ki kam pynroi khlem ka jingiapyntip mar kylliang ka pyni ba kam burom ia kata ka jingiakut jong ka status quo kaba la iateh ba shwa ban pyntreikam ia kino kino ki scheme ne project ha katei ka thaiñ ba ju iakajia pud dei ban ioh ia ka jingmynjur na baroh ar tylli ki Jylla hynrei ka sorkar Assam bunsien ka pynkheiñ ia katei ka jingiateh.
Kumta na ka liang jong ka Seng KSU kala maham tyngeh ba lada ka Sorkar Assam ka leh donbor khlem ka jingmynjur jong ki paidbah bad kumjuh ruh ki bor pyniaid ka District, ka Seng kan mih ban ïakhun pyrshah wat ban pynpra ia ka surok ne ban pynjulor ia ki kali bad ki kor ki bor.
