Kum kawei na ka shlem ai jinghikai bad ban pyntbit ia ki Pulit ka jylla ba kin pyndep ia la ka kamram kum kita ki Pulit na ka bynta ban ai ka jingshakri sha ki paidbah ka jylla, ka jylla Meghalaya lyngba ka tnad Pulit mynta ka sngi ka la ioh biang sa 193 ngut ki Pulit Constable bad 18 ngut ki Pulit Follower, kiba la pyndep ia ka jingshah ai jinghikai ha kawei na ka shlem ai jinghikai ki Pulit ha 4th MLP Batallion ha Sohpian.
Kane ka jingioh biang ka tnad pulit sa kumba 211 ngut ki Pulit, ka la paw mynta ka sngi ha ka jingiakynduh lang ba la tip kum ka Passing Out Parade jong ka Batch kaba 8 Recruits Constable, ba la pynlong ha APTC Sohpian, West Khasi Hills District.
Ka Kong I. Nongrang, IPS bad kaba dei ruh ka DGP ka jylla Meghalaya, ka la wan ban shim bynta kum ka kongsan bad ruh ban ai khublei kyrpang ia ki 211 ngut ki Pulit jong ka jylla, kiba la pyndep ia kane ka jingshah ai jinghikai jong ka tnad Pulit ka jylla.
Lyngba jong kane ka sngi, nalor kiwei kiwei ki heh pulit ka jylla, la don lang ruh u Bah Lakador Syiem, uba dei u Commandant ka 4th MLP Batallion, Sohpian, West Khasi Hills District.
