Khliehriat, May 24: Ka Voice of the People Party (VPP), ha ka sngi Saitjaiñ ka la pynlong ïa ka jingïalang paidbah ha Wika Complex, Khliehriat ban pynshai paidbah halor ki mat jong ka party bad ruh halor ki jingeh kiba ktah ïa ka jylla khamtam ka thaiñ East Jaiñtia Hills shuwa ka elekshon shiteng samoi ban jied ïa u nongmihkhmat na Shillong Parliamentary Seat sha iingdorbar thawaiñ ka ri.
Ha kane ka jingïalang paidbah la sakhi lang da u Bah Ardent M. Basaïawmoit, President ka VPP, u Bah Damewanhi L Rymbai President ka VPP East Jaintia Hills, ki dkhot ka Central Executive Committee (CEC), ki MDC ka JHADC, ki nongkitkam district lem bad bun ngut ki paidbah kiba la wan ban sngap ïa ka jingpynshai
Haba ai jingkren ha katei ka jingïalang, u Ardent M. Basaïawmoit u la pynpaw ka jingsngewkhia halor ka jingjur palat ka jing tih marpoh khyndew ha East Jaiñtia Hills, khamtam ka jingtih mawshun kaba lah ban wanrah jingma ïa ki krem ba don marjan, pynjaboh ïa ka lyer bad pynsniew ruh ïa ki wah bad ki um. U la ong ruh ba kine ki jingpynjulor kin pynduh noh ïa ki jingkyrkhu mariang kiba U Blei u la ai sha ki paidbah ka thaiñ.
U Ardent u la kynthoh ruh halor ki jingkynnoh pyrshah ïa ka VPP da kaba ong ba bun ki bor kiba nabar ki la pyrshang ban pyntlot ïa ka party ha ka elekshon MDC ka Jaiñtia Hills hynrei wat hapdeng kine ki jingeh, ka VPP ka la lah ban long ka liang pyrshah kaba khlaiñ hapoh ka JHADC. U la ong ruh ba lada ka shap jong ka VPP ka paw ha ki EVM ha ka elekshon shiteng samoi ban wan, ka party kan sa jop khlem pep.
Sa Pule Ruh | Sha Nala her ka Ambulance ba shah tynrah ha Kali I20
Halor ka kam tih dewïong, u Ardent u la ong ba lada shah tang katto katne ngut ki briew ban tih dewïong, dei ruh ban ailad lang ïa ki paidbah ba kin ïoh bynta lang ha kane ka kam hynrei ym ka jingïoh nong tang ïa ki briew ba donbor. U la batai ruh ba ka hukum jong ka National Green Tribunal (NGT) kam dei pyrshah ïa baroh ki rukom tih dewïong hynrei ka la pyrshah kyrpang ïa ka rukom tih thliew khnai namar ki jingma ïa ka mariang. Katkum ka jingïathuh jong u, kane ka jingkhang ka la ktah jur ïa ka jingïoh jingïarap bad ka jingïoh kam jong hajar ngut ki longïing.
Ha kajuh ka por, u President ka VPP East Jaiñtia Hills District, u Shri Damewanhi L. Rymbai, u la ong ba ka kam tih dewïong ha East Jaiñtia Hills ka la sdang naduh u snem 1980 ha shnong Wapungskur bad u la ïathuh ruh ba ma u hi u la trei ha kane ka kam ha ki snem kiba mynshwa. Katkum ka jingïathuh jong u, ha kato ka por ka ïoh ka kot jong ka district ka la kiew bha lyngba ka kam tih dewïong hynrei naduh ka jingkhang jong ka NGT ha u snem 2014, bun ki longïing ki la mad jingeh kaba khraw ha kaba ïadei bad ka ioh ka kot ka kamai kajih.
U Damewanhi u la kynnoh ruh ba ki sorkar jylla kiba la synshar naduh ka Congress haduh ka sorkar kaba mynta ki la ailad ïa ki briew ba donbor, ki mafia bad ki runar ban kamai na ki marpoh khyndew jong ka district khlem sngap shuh ïaka sur ki paidbah ba bun ba lang.
Sa Peit Ruh
