Nongpoh, Risaw 10: Ki paidbah nongshong shnong ka shnong Nongthymmai 15mer, Byrnihat mynta ka janmiet ki la tur syndon puk sha Thanad Byrnihat, kaba dei halor ka jingpyrshah ia ka jingshah thap u Rangbah Shnong katei ka Shnong ha uwei u rangbah Garo ba la tip kum u John Marak ha kaba la kynnoh ba u ju kam ba u dei nongpyniaid shnong ka shnong Garoi kaba marjan bad ka shnong Nongthymmai 15mer.

Kumba la iathuh, kane ka jingjia ka la jia mynta ka sngi ha ka por 1.40 baje ha ka shnong Rangsakuna, ha ka po rba ki Basan, ki Myntri ka Hima Mylliem bad u Syiem ka Raid Marwet ha ryngkat ki trai jaka  u Bah Dorjen Khongsni kiba la wan ban thew bad pynbeit ia ka jaka jong u  kaba don ha ka Shnong Nongthymmai 15mer.

Kumba la iathuh da u Rangbah Shnong ka Shnong Nongthymmai 15mer, u Bah Elin Suting, u la ong ba ia u kum u Rangbah Shnong bad ki nongialam Shnong la wan ai kot da ka Hima Mylliem ban wan pynbeit ia ka jaka jong u Bah Dorjen Khongsni, ha kaba da ka jingburom ia ka Hima ki la leit sha katei ka jaka ym ban tuklar ia ki kam jaka, hynrei ha kane ka por la wan poi u John Marak ha ryngkat ki spah ngut ki paid Garo kiba la shu leit thap beit ia u Rangbah Shnong ryngkat ki kyntien khlem akor bad kynnoh ba ki Khasi ki dei ki jaid bynriew ba ri bsein bad ruh ryngkat ka kyntien byrngem ba dei ban phet noh na katei ka jaka da kaba kam ba ka dei ka shnong Garo.

La iathuh ruh ba dei lyngba kane ka jingleh donbor u U John Marak bad ki paidbah Garoi, ki nongshong shnong ka Nongthymmai 15 mer da ka jingbitar ki la tur beit puk sha Thanad Byrnihat bad ujor syndon da ka ejehar pyrshah ia u John Marak da kaba dawa ruh ba dei ban pynshitom jur ia kum une u briew uba pyni bor wat ia u rangbah shnong ha kaba kane ka ktah ia ka shongsuk shongsain ki paidbah.

Halor kane ka jingja, na ka liang ka  Nongthymmai 15mer, ki la ai iaka jingkhublei iaki pulit ka Byrnihat kiba la shim khia ban kem noh ia u ne u briew, hadien ba la ujor da ka ehajar bad la lah ban pynjem noh ia ki paidbhur ki ba la bitar bad thmu ban tan ia u John Marak.