Nongpoh, Nailur 13: Ka Ri Boi Youth Federation (RBYF) ka la pynpaw ia ka jingsngewsih bad ka jingduhnong kaba khraw halor ka jinghlad noh u Dr. D.D Lapang,u MLA barim ka Nongpoh bad ruh Myntri barim ka jylla ha ka rta kaba la 96 snem, ha kaba kum ka seng ka ngeit ba ka jingkhlad noh u Dr. D.D Lapang ka dei ka jingpyniaid beit pyniaid ryntih jong U Blei Nongbuh Nongthaw.
U Working President ka RBYF u Bah Liander Nongshli, u la ong ba ka seng ka sngew dap ram halor ka jingkhlad noh u Dr. D.D Lapang kum uwei u nongialam ba radbah ha ka jylla bad ba la tip paidbah ruh kum u Kpa ka them Ri Bhoi. U la ong ruh ka seng RBYF kan burom bad kan iai burom ia u Dr. D.D Lapang ym tang kum uta u nongialam ba radbah ha ka jylla, hynrei u Dr. D.D Lapang u dei u nongseng ruh ia ka Ri Bhoi Youth Federation ha u snem 1979 ba ka seng ka la jam sha ki 46 tylli ki snem jong ka jingshakri na ka bynta ki paidbah ka Ri Bhoi bad ha ka jylla hi baroh kawei.
“Ka seng ka sngewduh nongshisha ia ka jingkhlad noh u Dr. D.D Lapang kum u nongialam uba long ka nuksa ba bha ia baroh bad ha kawei ka bynta ka seng ka seng kmen pat ruh ba u Dr. D.D Lapang shwa ba un leit noh na sla jong kane ka pyrthei dei ma u hi, uba la wan ban plie paidbah ia ka ophis treikam ka seng RBYF ha Saiden kaba la tei da ka seng RBYF, kaba long ka nongmuna ba ha ka jingialam bad ka jingdon kti lang u Dr. D.D Lapang ban kyrshan bad ban ai buit ai bor ka seng RBYF ka la dang lah ban pyniar ia ka jingshakri ha Ri Bhoi ban bud ia ki diejat ba bah jong jong u Dr. D. D Lapang.
Shuh shuh, u la ong ruh ba ka seng RBYF kam don kyntien pat ban ai ka jingsngewnguh ia u Dr. D.D Lapang uba la noh synniang ha broh ki liang ha ka jylla bad kum ka seng pat ka phah ia ka khubor sngewlem sha ka ing ka sem, ki khun ki kti, ka long jong u D.D Lapang ba u Blei ka jingsuk un pyntngen ha kane ka jingduh noh ia une u nongialam bad u Dr. D.D Lapang ruh un ioh ia kata ka jingjahthaid kaba bym ju kut ha Bneng bad ruh ba un kyrkhu na sha lyndet ia ka ing ka sem, ki khun ki kti bad kumjuh ruh ia ka RBYF ba kan dang lah shuh shuh ban shakri kham bha na ka bynta ki paidbah jong ka dong bad ka them Ri Bhoi baieid jongngi, u la bynrap.
