Nongpoh, Risaw 25: U Bah Lamphrang Kharbani, President Rangbah ka Hynniewtrep Achik National Movement (HANM) Sengkmie, mynta ka sngi u la hiar sha ka shnong Bhoirymbong bad kata ka long ban pynskhem ia ki nongkitkam ba pura ka HANM Bhoirymbong Circle, kaba dei ruh hadien ba ki samla na katei ka thain, ki la rung bad pyniasoh noh ïalade sha ka HANM.

Ia katei ka jingpynskhem ia ki nongkitkam ka HANM Bhoirymbong Circle, la pynlong ha Bhoirymbong, ha kaba nalor ka jingdon u Bah Lamphrang Kharbani, la sakhi da ka jingdon kiwei ki nongkitkam ka HANM lem bad kiwei pat ki samla kiba la pyniasoh ïalade sha ka HANM bad ba kin sa traikam na bynta ka samoi treikam jong u snem 2025 haduh u snem 2028.

Haba kren ha katei ka sngi, u Bah Lamphrang Kharbani, u la ai khublei ia kitei ki samla kiba la pyniasoh ïalade sha ka HANM, ha kaba lyngba ka HANM, ba kin nanglah shuh shuh ban trei na bynta ka bha ka miat ha ka shnong ka thaw, ka dong ka thain bad khamtam eh na bynta ban iada na bynta ka Ri bad jaidbynriew.

Lyngba jong katei ka sngi, na ka liang u Bah Lamphrang Kharbani, u la kyntu ia kitei kiba la pyniasoh sha ka seng, ba ki dei ban long kiba iatreilang lem bad ki nongialam Shnong, ki nongialam raid bad Hima ruh kumjuh, kata na bynta ban iada ia ka khyndew ka shyiap jong ka jaidbynriew.

Nalorkata, ngi dei ruh ban don ia kata ka mynsiem ban Ieid ia ka shnong ka thaw, ka dong ka thain bad khamtam eh ia ka jaidbynriew, hynrei ym ban long kum kita ki briew kiba don ia kata ka mynsiem ban rung sha ka seng, da kaba don ia ka mynsiem ba sniew na sha lyndet ne shim kabu ha kyrteng ka seng, pynban ki dei ban long kum kita kiba trei na bynta ka bha ka miat ha ka shnong ka thaw bad ka dong ka thain.

Ki nongkitkam ka HANM Bhoirymbong Circle bad kiba la shah pynskhem ha katei ka sngi, ki kynthup ia u Bah Rodrik Rocky Syiemiong, kum u President, u Bah Raplang Sumer kum General Secretary, u Bah Klesing Lyngdoh lem bad kiwei.