Nongpoh, Jylliew 8: Uwei na u MLA na Ri Bhoi bad uba dei ruh u MLA ka Mawhati Constiteuncy, u Bah Charles Marngar u la pynpaw ba ka ophis ba pura ka RBYF ka dei ban long ka shlem ban saindur na ka bynta ka Ri Bhoi District ba kum ka District kan dang kiew shaphrang ha baroh ki liang.
Na ka liang utei u MLA ka Mawhati u Bah Charles Marngar ula pynpaw ïa kitei ki kyntien ka dei ha ka jingdon bynta hynnin ka sngi ba ka RBYF ka la plie paidbah ïa ka ophis treikam ba kum u MLA u la ai mynsiem ïa ki nongïalam ka RBYF ba kim dei ban kmen tang ha kaba ioh ban plie ïa ka ophis treikam, hynrei lyngba kane ka ophis treikam kan long kata ka shlem kaba kyrpang ba kum ki nongïalam kin ïa shong pyrkhat na ka bynta ban saindur ïa ka bha ka miat bad ka roi ka par jong ki paidbah ha Ri Bhoi District.
U la ong ruh kam dei ka kam kaba suk ba ka RBYF kan ioh ïa kata ka ophis treikam kaba pura ha kaba mynta la ïaid lynti la 45 snem, hynrei kane ka dei ka jingkitkhlieh ki nongïalam ba ka RBYF kaba la pynlong pura ïa ka RBYF ba kan ioh ïa kane ka ophis bad lyngba ka jingdon ka ophis kan long shisha ka lad ïa ki nongïalam ba kin ioh ïa kata ka lad ban ïa kren ne ïa tai sani kumno ban ïa kren ïa ka eh ka shon bad ki kam kiba kum ki nongïalam ki hap ban peit kyrpang ïa ka eh ka shon ki paidbah ka District.
Kum ka jingai mynsiem ïa ki nongïalam ka RBYF, u Bah Charles Marngar u la ong ba ka RBYF ka dei ban pynlong ïa katei ka ophis kum ka ing kaba kyntang bad lyngba kane ka ophis kin mih shibun ki jingpyrkhat pyrdain ba ki nongïalam kin ïa kren kumno ba kyntiew ïa ka dong bad ka thaiñ Ri Bhoi. Shuh shuh, kaba u kham ban khia ka long ba u angnud ba ka RBYF kan pynlong ïa katei ka ophis kum ka jaka ban ïa jinghikai (Councelling Centre) na ka bynta ban ai jinghikai ïa ki paidbah bad ruh ban saindur ïa baroh ban ïa kren na ka bynta ki mat ki jura kiba ka Ri Bho District ka donkam ïa ki nongïalam ka RBYF, u la bynrap.
ANGNUD U MLA MAWHATI BA KA OPHIS KA RBYF KA DEI KA SHLEM BAN SAINDUR ÏA KA RI BHOI
