Ka Nongpoh Town Committee (NTC) ka la mih shakhmat ban pynsngew biang sha ka sorkar halor ka jingshah ktah ki paidbah ha ka thain Nongpoh, kaba dei na ka jinglip bad ka jingthud ba khah khah ka bording ilektrik bad ka la pynsngew ba la dei ka por ban pynsted noh na ka bynta ban wan rah noh ia ka 132 KV Power Sub Station ha Nongpoh.
Kumba la pynpaw da u Secretary ka Nongpoh Town Committee, u Bah Rayanold Kharkamni, u la ong ba kum ka Town Committee ka dap da ka jingsngewkhia halor kane ka jingeh ba ia kynduh da ki paidbah ka thain Nongpoh halor ka jinglip palat ka bording ilektrik bad kane ka la ktah shisha ha baroh ki liang jong ka jingdonkam ki paidbah lada ym biang thikna ka bording.
“Ka jingbym biang ka bording ilektrik ka ktah naduh ki khynnah skul kiba hap ban pule kot, ki dukan bapher bapher kiba shaniah ia ka bording ilektrik na ka bynta ban pyniaid ia ki kam ki jam, ha kaba ha kane ka juk mynta kiba bun ki kam ki sahkut lut lada ki paidbah kim ioh ia ka bording ilektrik” ong u Bah Rayanald Kharkamni.
U la pynpaw ruh kawei na ka daw ka jingthud palat ka bording ka dei ka jingjngai jong ka line ba pynpoi ia ka bording sha Nongpoh kata nduh na Stage III Power Station Kyrdemkulai, ha kaba ka jingjngai ka la kot sha ka 40 km kaba dei tang na ka bynta ka 33/11 KV power station.
U la ong ruh dei namar ba ym lah ban pynkhuid ia ka line naduh katei ka jaka ban poi sha Nongpoh tang shu thud ka bor mariang, ki paidbah ki la hap ban shongdum na ka daw ba ki tyngkhung ki dieng ki siej kiba ym lah ban pynkhuid na ka por sha ka por.
U la bynrap ruh da kaba ong, ba ka long ruh ka jingshah ktah shisha ia ki paidbah ha kaba ka Nongpoh kum ka Headquarter jong ka District ka hap ban mad ia kane ka jingthud ka bording ilektrik bad kaba la long ruh ka jingthud ia ki paidbah, namar na ka por sha ka por kam ju don satia kata ka sngi kaba biang ka bording bad lada ka long ha kane ka rukom kan ktah shisha ia ki paidbah kiba hap siew tang ia ka bai bording man la u bnai bad kim ioh pat ia kata ka bording jingshai ba thikna.
Namarkata, na ka liang ka Nongpoh Town Committee ka kyrpad ia ka sorkar lyngba ka tnad MeECL ba kan shim khia noh ha kaba wan rah ia ka 132 KV Power Substation ha Nongpoh bad na ka liang ka Nongpoh town Committee ruh kan buddien ia kane ka kam wat ban leit kynduh ruh ia u myntri sorkar ba dei ka peit ia ka tnad bording khnang ba kane ka 132 KV Power Substation kan urlong noh bad ruh ba ki paidbah ruh kin nym mad shuh kajuh ka jingeh kaba dei ka jingthud palat ka bording ha ka thain Nongpoh bad wat ha Ri Bhoi hi baroh kawei, la bynrap u Bah Rayonald Kharkamni.
