Ka jinglip bording khah khah haka thaiñ Ri Bhoi Sepngi kala buh jingeh ïaki paidbah ha katei ka thaiñ bad pynbitar ruh ïaka seng Ri Bhoi Youth Federation, Western Zone namar khlem slap khlem lyer ka bording ha katei ka thaiñ kam ju don thikna bad haduh mynta ki paidbah katei ka thaiñ ki hap ban shong dum.
Naka liang ki nongïalam ka RBYF bad bun ki paidbah bad wat ki nongialam shnong ruh ki la pynpaw ka jingbitar halor ka jingbym shim khia ka tnad MeECL ban pynbiang bording sha katei ka thaiñ, namar ki paidbah ki hap ban siew tang ia ka bill light bad katba ia ka bording ilektrik pat kim ju ioh thikna katkum ka jingdonkam jong ki.
Haba phah ïaka kyrwoh naka liang u Samla Rao Nongtri Publicity Secretary ka RBYF Western Zone u la ong ba kum ka seng ka dap da ka jingsngewkhia halor ka jingbym thikna ka bording ilektrik ha katei ka thaiñ kaba la pynjynjar ïaki paidbah, kumba ka tnad MeECL kam ju kheiñ snep watla ki paidbah ki ud naka por shaka por.
U la ong ruh haduh mynta ba thoh ïa kane ka khubor ki paidbah ha katei ka thaiñ ki dang hap ban shongdum khlem bording naduh hynnin ka sngi bad kane ka la pynbitar shisha ïaki paidbah namar kam don kawei ka por ruh ba biang ka bording ilektrik bad bun ki kam ki la shu pulom noh namar ba ym ju poi thikna ka bording ilektrik kumba donkam ki paidbah.
Shuh shuh u la ong ruh ba kane ka jinglip bording ne ka jingbym poi bording thikna sha katei ka thain kam dei tang ha kane ka kynti bad sngewsynei ia ki paidbah ba naduh ki snem ba la leit bad haduh mynta ruh ka bording kam poi thikna bad teng teng kam don jingmut ba ki paidbah kin siew tang ia ka bill light bad katba kim ioh pat ia ka bor jingshai kumba ki donkam.
Namarkata naka liang ka seng ka dawa naka tnad MeECL ba ka dei ban shimkhia mardor ban pynbiang ïaka bording elektrik ha katei ka thaiñ, shuwa ba ka seng kan shim da kiwei pat ki sienjam ba tyngeh.
