Kum uwei na u nongmihkhmat paidbah na Ri Bhoi District bad uba dei ruh u MLA ka Nongpoh Constituency, u Bah Mayral Born Syiem mynta ka sngi u la pynpaw ia ka jingbynniaw kaba khraw halor ka jingthud palat ka bording iletrik ha Ri Bhoi District, kaba la ktah lut ia ki kam ki jam jong ki paidbah ha kane ka District.
Haba ia kren sha ki lad pathai khubor, u MLA ka Nongpoh, u Bah Mayral Born Syiem, u la ong ba kum u nongmihkhmat paidbah u dap da ka mynsiem jong ka jingsngewkhia halor kane ka jinglip ba khah khah ka bording ilektrik bad ia mynta ba ym pat lah ban pyntreikam ia ka 132 KV power station ka tnad MeECL ka dei ban shim khia na ka bynta ban pynbiang ia ka bording ilektrik.
U la ong ruh ba kum u Nongmihkhmamt paidbah u ai khublei ruh ia ka sorkar jylla kaba la sngap ia kane ka jingud jingnam ki paidbah na ka bynta ban wan rah noh ia ka 132 KV Power station ha Nongpoh, kaba la mang tyngka haduh 78 klur bad kyrmen skhem ba da ka jingdon kane ka power station kan weng noh ia ka jingeh ki paidbah kiba shah ktah na ka jingthud ka bording ilektrik kaba man la ka ka por.
U la bynrap ruh da kaba ong ia mynta kat bym pat treikam katei ka 132 KV Power Station, u la kyntu ruh ia ka tnad MeECL ba ka dei ban shim khia halor kane ka mat ka jingshah ktah u paidbah na ka daw ka jingthud palat ka bording ilektrik, namar ha kine ki sngi khlem ka bording ilektrik ka long shisha ka jingshah ktah jur ia ki paidbah ha kaba jan baroh ki jaid kam la hap ban shaniah ha ka bording ilektrik.
Shuh shuh, u la pynpaw ruh ba ia kane ka 132 KV Power Station yn wan rah ha Nongpoh ba shen kin sdang ban shna bad kyrmen skhem ba da ka jingwan poi kane ka power station kaba kham heh, kan weng lut ia ka jingeh ki paidbah kiba shah ktah na ka por sha ka por na ka daw ka jingthud palat ka bording ilektrik.
