Ki paidbah nongshong shnong ka thaiñ Patharkhmah lyngba ka Sur u Paidbah ka Western Ri Bhoi, ki la pynlong da ka jingiaid paidbah ha Patharkhmah na ka bynta ban dawa ban pynlait mardor ia u Bah Bakstar Diengdoh, uba la shah kem ha ka tnad Forest na Assam.
Naduh ki longkmie, ki longkpa, ki samla, ki seng bhalang, ki khynnah skul bad ki riew rangbah, ki la mih paidbah mynta ka sngi, ban ia iaid paidbah da kaba rah ia ki lama bad ki banner, shi bynta ban pynrem jur ia ka tnad Forest na Assam, kaba la kem khlem Nongrim ia u Bah Bakstar Diengdoh bad ki la dawa ruh na ka sorkar Meghalaya ban shim khia, na ka bynta ban ia kren sha ka sorkar Assam ban pynlait noh mardor ia u Bah Bakstar Diengdoh khlem da don kano kano ka jingteh kyndon.
Na ka liang kane ka sur u paidbah ka Western Ri Bhoi, nalor ka jingiaid paidbah ban pynrem jur halor ka jingshah kem utei u rangbah, ki la leit tur ruh sha ka ophis treikam u SDO ka Patharkhmah Civil Sub Division ban aiti ia ka dorkhas bad kum ka kynhun ki la pynpaw ruh ka jingsngewkhia ba u SDO um shym la don ha katei ka ophi treikam. Dei halor ka jingbym u SDO ki la hiar noh sha Nongpoh, da ka jingthmu ban leit aiti syndon ia ka dorkhas sha u Deputy Commissioner ka Ri Bhoi, halor ki mat jingdawa ba ki dawa ban pynlait noh ia u tei u rangbah ba la shah kem ha ka tnad Forest jong ka Assam.
Kumba la kren ha kane ka sngi naduh ki nongialam seng bhalang bad ki riew rangbah, ka sur kaba ki la pynpaw, ka long ba ki pyrshah jur ia ka tnad Forest na Assam, kiba la kem khlem Nongrim ia u Bah Bakstar Diengdoh bad ha kajuh ka por ruh ki la dawa na ka sorkar Meghalaya ba kan tuklar mardor na ka bynta ban pynlait noh ia utei u rangbah.
Kitei ki riew rangbah bad ki nongialam ki la pynrem jur ruh halor ki kam thombor ka tnad Forest bad ki Pulit ka Assam bad man ka por ki ju mih ki huri hura ha kitei ki shnong khappud, ka dei tang na ka jingleh donbor ka tnad Forest bad ki Pulit ka Assam, kaba la ktah ia ka shongsuk shongsain ki paidbah ha kitei ki shnong khappud.
Kum ki riew rangbah bad ki nongialam, ki la dawa ruh mardor na ka sorkar Meghalaya lyngba u Myntri rangbah bad ki bor sorkar, ba ki dei ban ia kren noh mardor sha ka sorkar Assam, na ka bynta ban pynlait noh mardor ia utei u rangbah ba la shah kem ha ka tnad Forest ka Assam bad ku la pynpaw ruh ba lada kum kine ki kam shah thom bor ki paidbah ha khappud kan dang bteng lyngba ka jingpynibor ka tnad Forest bad ki Puit ka Asam, kum ki paidbah ruh kim banse ban shim noh da ki lad kiba tyngeh ba ia pyrshah wat lada dei ban iaid da kano kano ka lynti.
