Nongpoh, Jylliew 18: Uwei na u nongïalam ka National People Party (NPP) na Ri Bhoi District u la pynbna ïa lade ba u la iehnoh kam noh kum u nongïalam ne dkhot katei ka party na Ri Bhoi District.
Une Rangbah uba la iehkam noh na ka party NPP,u dei u Bah Albertus Lapang,uba bat kum u Organizing Secretary ka NPYF Ri Bhoi District bad ruh u dkhot nongïalam ka party NPP na Jirang Block.
Kumba la pynpaw ha ka shithi iehnoh kam ba la phah sha u President ka NPP Ri Bhoi District bad sha u President ka NPP Jirang Bock, u Bah Albertus Lapang u la pynpaw ba u la iehnoh kam bad ba um dei shuh u nongïalam ne u dkhot kane ka party bad pynshai ruh ba ka jingiehnoh kam jong u, kam don satia kano kano ka kam kaba pyrshah ïa ka party NPP, hynrei u hap ban iehnoh kam noh na kane ka party ka dei halor ki daw shimet jong u.
Shuh shuh, u la ai ruh ka jingkyrkhu kyrdoh ïa ki nongïalam kane ka party NPP ha Ri Bhoi District bad ha Jirang Block ba kin dang ïai bteng ïa ka jingshakri na ka bynta ki paidbah bad u kyrmen skhem ruh ba kane ka party kan dang lah ban leh shibun ki kam kiba khraw kiba long ka jingmyntoi na ka bynta ki paidbah ka them Ri Bhoi.
U Bah Albertus Lapang, uba la iehnoh kam noh na ka party NPP, u dei ruh u khun jong u Bah William Mynsong, MDC barim ka Jirang bad u pyrsa u Dr. D.D Lapang bad ruh uba la pan ticket na party NPP ban ïa khun MDC ha ka election MDC ba dang shu dep ka KHADC.
