Ka Network Jio Ka Long Thik Kum Ki Nongtrei | Tynruh Ka HITO Sha Ophis Ba Mat Jingeh Ki Paidbah

Nongpoh, Nailar 25: Ki Nongïalam ka Seng Hynniew-trep integrated Territorial Organisation, Ribhoi District lem bad na Umden Area ki la leit mih sha Ophis jong ki artylli ki mobile Network service kata ka Jio Service bad ka Airtel service ki ba don ha Nongpoh ban Pynpaw haki iaki jingeh ba ki Paidbah ka thaiñ Umden ki mat nakadaw ba ym don network ha kitei ki jaka mynta la bun bun sngi.

Naka liang kitei ki nongïalam ka Seng ki la ioh ban ia Kynduh bad ki briew kiba trei haka Ophis Airtel bad ki la ioh ban Pynpaw haki iaka jingbym don network ha ka thain Umden. katba, haka Ophis Jio ym shym la don Briew kiba shong bad ap ia katei ka Ophis watla ka Ophis ka plie.

Haba kren naka liang u Samla Marius President ka HITO, Ribhoi District u la iathuh, Nakadaw ka jingbym don Network jong ka Airtel bad Jio ha kitei ki thaiñ mynta la bun bun sngi, ki Paidbah ki la mat shibun ki jingeh naba kim ioh ban pyndep iaki kam naduh ki kam bank, ki kam haka pule ka puthi, ki kam shnong kam thaw bad haduh ki kam kiba iadei ban phah jingpyntip kiba long kyrkieh.

Kane ka jingbym don network jong kitei ki artylli ki Mobile Tower ka la wan rah shibun ki jingeh haki shnong ki thaw kaba la pynlong iaki ban leit mih sha ki Ophis Treikam ban ujor bad wat jingtip.

Sa pule ruh: Leit jngoh ki nongialam ka KSU ia ki nongialam ba shah kem ha District Jail Shillong

U la iathuh, haka jingiakren bad ki Nongtrei ha Ophis Airtel ki la ong ba kadaw ba duh network ha kitei ki jaka ki dei namar ba don ka jingshah tuh ki tiar ki tar haka jaka ba don u mobile Airtel tower. Watla kata naka liang ka Seng ka la kyntu iaki Nongtrei ka Airtel ba kin thaw kino kino ki lad ki lynti ban pynioh biang ia ka mobile network bad ba kin shim ruh iaki sienjam ba kan nym don shuh ka jingduh network ha kitei ki thaiñ.

U Samla Marius u la iathuh, ha kaba iadei bad ka network Jio, naka liang jong ki kim shym la ioh ban kynduh iano iano namar ba kim don ha Ophis watla ka Ophis ka plie.

U Samla Marius u la kyntoh ruh iaka Network Jio ba haka thain Umden ka long thik kum ki Nongtrei jong ka, namar ba u tower u don hynrei ka network kam don bad haba wan pat sha Ophis ban Pynpaw iaki jingeh, ka Ophis ka Plie katba ki Nongtrei pat kim don.

Shuh shuh u la ong ba, lada ha kane ka rukom ka Ophis Jio ka treikam, la donkam ban shu khang noh iaka Ophis, namar ba kam don jingmut ban buh iaka Ophis haba ki Paidbah kim ioh ban kynduh iaki nongpeit nongkhmieh jong ka Network Jio.

Sa peit ruh