Nongpoh, Risaw 6: Ka Bharatiya Janata Party (BJP), Ri-Bhoi District, ka la pynpaw ïa ka jingsngewkhia halor ka jingthud palat ka bording elektrik ha ki bynta bapher bapher jong ka Ri-Bhoi District, kaba la ktah ïa ka jingim ba man ka sngi jong ki paidbah.
Naka liang ka party ka la aiti da ka jingthoh sha u Superintending Engineer (SE), Meghalaya Power Generation Corporation Limited (MePGCL), ha Umiam, hynrei namar ba um don la shu aiti noh sha ki ophisar ba don ha katei ka ophis bad ruh sha u Deputy Commissioner, Ri-Bhoi District, ban dawa ba ki bor ba dei peit kin shimkhia halor ka jingeh kaba ki paidbah ki mad, kynthup ïa ka jingthud jong ka bording bad ka jingkiew jong ka bai bording khlem ioh pyndonkam.
Haba kren sha ki lad pathai khubor, u Bah Sen Thabah, President, BJP Ri-Bhoi, ryngkat u Bah Bandari Ryntathiang, President, BJP Umroi Mandal, u Bah Teibor Nongshli, President, BJP Umsning Mandal, u Bah Albertus Lapang, President, BJP Jirang Mandal, bad kiwei ki nongïalam, ki la ong ba ka party ka la ïoh bun ki jingujor na ki paidbah halor ka jingthud jong ka bording.
Kila ong ba kane ka jingeh ka ktah ym tang ïa ki longïing, hynrei ïa ki khynnah skul bad samla pule, ki nongseng kam seng jam, ki ophis bad kiwei ki kam kiba shanñiah ha ka bording elektrik. Ka jingthud jong ka bording, ka lah ban ktah ïa ka jingpule, ka jingtrei bad ki kamai kajih jong ki paidbah, hynrei ki bill light ki kiew shaba palat wat haba ki paidbah kim ioh pyndonkam.
U Bah Sen Thabah bad ki nongïalam kiba donlang ki la pynpaw ba ka long kaba donkam ïa ki bor ba dei peit ban wad ïa ka daw jong ka jingthud bad ban shim ïa ki sienjam kiba biang ban pynbeit ïa ka jingpynpoi bording, khnang ba ki paidbah kin nym mad jingeh, namar ka Ri Bhoi ka dei ka jaka pynmih bording katba ki shnong ki hap ban shong hapdeng ka jingdum.
Ka party ka la maham ruh ba lada ym don ka jubab ne ka sienjam kaba shai ban pynbeit ïa kane ka jingeh, ka lah ban pynlong ïa ka jingïakhih paidbah, kynthup ïa ka rally bad ka jingïaid paidbah ryngkat ki placard, ban pynsngew ïa ka jingdawa jong ki sha ki bor sorkar.
Sa peit ruh
[…] Sa pule ruh: Kiew Ka Bai Bording Wat Hapdeng Ka Jingthud, Aiti Ka BJP Ri-Bhoi Da Ka Dorkhas Sha Ki B… […]