Nongpoh, Jylliew 03: Ka kynhun ki Kontraktor ha Ri Bhoi kiba don hapoh ka shatri Bhoi Government Contractors & Suppliers Association (RGC&SA), mynta ka sngi ki la leit ban kynduh ia u Dr. Abhishek Saini, Deputy Commissioner ka Ri Bhoi, na bynta ban pynsngew sha u halor ki jingeh ba ki iakynduh, ba kum ki Kontraktor kim ioh ban trei ia ki kam ki jam, haba wan kino kino ki jingpyntrei hapoh ka Distrik.
Katei ka kynhun ki Kontraktor bad suppliers, shwa ba kin leit ban kynduh ia u DC, ki la pynlong shwa da ka jingiaid paidbah, da kaba rah ruh ia ki plakad, ba ki la sdang na Nongpoh haduh ophis u DC.
Haba iadei bad katei ka jingleit ban kynduh DC, u Bah Plielad Tiewsoh, u la ong ba ha ka jingiakren bad u DC, ka jingiakren ka long kaba seisoh, kata haba sngap katkum ka ktien ba u kren, namar u la kular ba un shimkhia halor katei ka mat kaba la pynsngew da kitei ki Kontraktor bad suppliers.
Shuh shuh, u la ong ba ha katei ka jingiakynduh, u DC u la kular ba un sa khot ia baroh ki ophisar na ki tnat treikam bapher bapher, ban kren sha ki ba ka rukom aikam aijam sha ki kontraktor ka dei ban long kaba khuid ba suba ha baroh ki tnat treikam sorkar.
Ha ka jingiakren bad u DC, ngi la ioh ruh ban pynsngew ba nangne shakhmat la dei ban pynbna beit da ka open tender bad ym dei shuh ban buh ia kita ki close tender, bynrap u Bah Plielad Tiewsoh.
Namarkata, lyngba ka jingiakynduh ia u DC, ngi kyrmen ba nangne shakhmat ba ka rukom iohkam iohjam ko kontraktor bad suppliers hapoh ka Distrik ba ka dei ban long kaba khuid ba suba khlem da don ka jingniew shilliang khmat, u la bynrap.
Sa peit ruh
