Nongpoh, Jymmang 13: Ki nongialam ka National People’s Youth Front (NPYF) Ri Bhoi District, ia kaba la ialam da Bah Poipynhun Rynghang, State General Secretary lem bad ki para dkhot ka NPYF, ki la leit ban pynkup burom ia u Iateilang Nongrang, u khynnah skul uba la lah ban pyllait im ia iwei i khyllung kynthei ba dang shu kha bad iba la shah tep im ha khyndew, kaba la jia ha kawei na ki shnong kaba don ha ki thain Mawhati, Ri Bhoi.

Haba leit ban pynkup burom ia utei u khynnah skul, la sakhi ruh da ka jingdon kiwei ki para nongialam ka NPYF Ri Bhoi, kiba kynthup ia u Bah Pynbhalang Syiem, General Secretary NPYF Ri Bhoi District, u Bah Damiyo Lamare lem bad kiwei.

Ka nongrim kaba la pynlong ia kitei ki nongialam ka NPYF ba kin pynkup burom ia utei u khynnah skul, ka dei ba ki la niew bad khein ia u kum uwei na ki riew shlur, ha kaba ka jingnud bad shlur jong u ban sei ia i khyllung na ka jaka ba i la shah tep im, ka pynlong ia itei i khyllung ba in lait na ka jingjia ba sngewsih.

Ia ka jingialang ban pynkup ia utei u khynnah skul, ka pynlong hapoh ka skul ba utei hi u khynnah u pule bad ha katei ka sngi pynkup burom, nalor ka jingdon ki dkhot ka NPYF, la sakhi ruh da ka jingdon ki nonghikai lem bad ki khynnah kiba pule ha katei ka skul.