Nongpoh, Jylliew 17: Mynta ka sngi kaba dei ruh ka lyngkhuh sngi iap ba 38 snem jong u (L) Biswal Paul Makri, u dkhot ba shitrhem ka Khasi Student Union (KSU) ha ki por ba dang long nongialam u (L) Bull N. Lyngdoh, ha kaba u la khlad noh na sla pyrthei hadien ba u la shah siat ha ki Pulit CRPF ha ka por ba u dang iakhun na bynta ki dawbah jong ka jaidbynriew bad kaba la jia ha ka 17 tarik jong u snem 1987 ha Motphran, kiba dei ruh ki snem jong ka jingsdang ba ka seng KSU, kan beh naphang ia ki mynder ri bad kiba la sdang ban pynlong jaka buhai shnong ha kylleng ki jaka hapoh ka Ri Khasi.
Lyngba jong katei ka sngi ba ka KSU, ka la kynmaw kyrpang ia ka lyngkhuh sngi iap jong utei u riew shlur, ia kaba la pynlong ha madan Umsning, na ka liang ka KSU Umsning Circle, ki la ioh ruh ban pyllait paidbah ia kawei ka Ambulance ne ka kali kit nongpang, kaba ki la thied na ka pisa kaba la mih na ka jinglah jong ki ban pynlong ia ka ‘Maitshaphrang Cup’ ka lympung ialehkai phutbol kaba ka KSU Umsning Circle kaba dang shu pyndep shen ha madan Umsning Patarim, ha kaba ka jingthmu jong ka seng ban thied ia katei ka Ambulance, ka long na bynta ban ai ka jingshakri na bynta jong kito kiba donkam kali kit nongpang bad kiba duna ka ioh ka kot.
Haba pyllait paidbah ia katei ka Ambulance jong ka KSU Umsning Circle, la sakhi da ka jingdon u Samla Donald V. Thabah, General Secretary ka KSU Sengkmie kum u Kongsan, u samla Ferdynald K. Kharkamni, President ka KSU NKHD, u Bah Rocky Kylla, Chairman ka Umsning Town Dorbar, u Samla Lester Nongbet, President KSU Umsning Circle lem bad kiwei ki riew rangbah ka thain.
