Da ka jingsngewkhia kaba jur halor ka jinglong jingman jong ki paidbah nongshong shnong ha ki thaiñ khappud ka jylla Meghalaya khamtam ha Ri Bhoi District kiba ju im hapdeng ka jingshong syier na ka jingkyntur pud bad jingpyni bor man ka por bad ki nongshong shnong ka Assam, na ka liang ka Hynñiewtrep Youth Council (HYC) Ri Bhoi District mynta ka 23 tarik Naitung ka la leit rah ïa kane ka mat ban ïa kren bad u Deputy Commissioner (DC) ba thymmai ka district ban shimkhia noh mardor halor kine ki jingeh ba mad da ki nongshong shnong khappud jong ka District bad ka Assam khamtam ha ki thaiñ Block II.
Ha kane ka jingïakynduh bad u Abhilash Baranwal DC ka Ri Bhoi District, na ka liang ka HYC la lamkhmat da u samla Tony Shylla General Secretary lem bad ki nongkitkam, ki la leit ban aiti da ka dorkhas halor kane ka mat kaba la ktah shikatdei ïa ka shongsuk shongshngaiñ ïa ki paidbah kiba sah ha ki thaiñ khappud ka Block II markhap bad ki shnong ka jylla Assam bad ruh ïa ka mat halor ka jingktah jur ka jingjyllei u drok hapoh ka district bad ka jylla.
Haba kren bad ki Nongthoh Khubor, u Samla Tony Shylla, u la ïathuh, ba kum ka seng hi kaba shakri ïa ka them Ri Bhoi District, da ka jingsngewkhia halor ka jingïai mad jingeh ki paidbah ha ki shnong khappud khamtam kito ha ka Block II mynta ka sngi ka la leit ban rah ïa kane ka mat hakhmat u DC ba thymmai ka District khnang ba un shimti ïa ki lad ki lynti kumno ban weng noh ïa kine ki jingeh kiba mih na kawei ka por sha kawei pat.
U la ïathuh ruh, ba ka seng ka la leit rah ruh ïa ka mat kaba sngewkhia bha kata, halor ka jingnang kynrei u drok ha kane ka district bad buh jingma shikatdei ïa ki khun samla ka dong ka thaiñ bad ba u ne u jaid jingdih buaid u la pynjot ïa ka lawei ki khun samla ha ka jylla hi baroh kawei bad pynsngewsih ïa kiba bun ki longïing ha kane ka jylla.
La pyntip ruh, ba ha kane ka jingïakynduh bad u DC, na ka liang u Abhilash Baranwal kum u DC u la ai ïa ka jingkular ban shimkhia noh mardor ïa kine ki mat ba ka HYC ka la wanrah bad pynpaw ruh ïa ka jingsngewnguh, ban ïa treilang na ka bynta ki mat kiba kongsan na ka bynta ka bha ka miat jong ki paidbah ka district Ri Bhoi bad ruh ka jylla Meghalaya hi baroh kawei.
