Nongpoh, Risaw 04: U wei u rangbah u la mynsaw jur haduh ka kheiñ ka kjat hadien ba ka scooty kaba ki shong ar ngut kala kylla kynsan mynta ka sngi ha surok bah National Highway haka shnong Dulongnar ha Ri-Bhoi District.
Katkum ka jingtip bala ioh lum la ong ba kane ka jingjia kala jia haka por kumba 3:30 eiei ha kaba katei ka scooty kaba la shong da ar ngut ki briew kaba don ïa u number AS 25 A 4416 ka dang hiar sha ki thaiñ Nongpoh, hynrei kyndit kynsan namar ka don ka jaka kaba sniew ha katei ka jaka u nongñiah um lah ban teh lakam shuh ïaka scooty haduh ba kan da kylla bad uwei u rangbah ba shong ha katei ka scooty u la mynsaw jur bad kheiñ ruh ka kjat.
Naka liang ki pulit ka Nongpoh Traffic tang hadien ka jingioh jingtip kila leit mar mar sha katei ka jaka ban pynlong ka jingtohkit bad ïa kitei ki ar ngut kiba la mynsaw la pynkit noh sha Nongpoh Civil Hospital ban ioh ka jingsumar ba kyrkieh.
Lah ruh ban kdew hangne ba ka jingsniew ha bun bynta jong u surok 4-lane ha Ri-Bhoi District kala long kum ka jingpynap shrip ïaki kali ba leit ba wan khamtam ki ar shaka, ha kaba ki bor ba dei peit khamtam ka NHAI ki dei ban shimkhia ban pynbha ïa baroh ki bynta jong u surok khamtam ki jaka ba don ki thliew bad kiba sniew.
Sa peit ruh
