Nongpoh, Jylliew 03: Ka la long ka jingkyrkhu kaba khraw eh ia ki samla pule kiba shong ba sah ha ki phew tylli ki shnong kiba don ha ka thain Warmawsaw, Ri Bhoi Sepngi bad kata ka dei hadien ba la lah ban plie noh ia ka Warmawsaw Higher Secondary School Arts Stream, ia kaba la leit ban plie paidbah da u Bah Sosthenes Sohtun, MLA Jirang bad uba dei ruh u Myntri sorkar jylla.
Lyngba ka jinglah ban plie ia katei ka Warmawsaw HSS Arts Stream, kan pynsuk ia ki samla pule, kiba don ha ki shnong ha katei ka thain bad kiba sha khappud sha Assam, ha kaba ki samla pule ki ban sa ioh jingmyntoi, ki kynthup ia ki samla na ka shonng Umsohbar, Bakhlapara, Nongdom Mawpliang, Mustang, Modem,Belahari, Rajakhumai, Umkynsier, Balakhwa, Patgoan, Bernongsai, Lyngkhung, Ranibari lem bad kiwei.
Haba plie ia katei ka Warmawsaw HSS Arts Stream, nalor ka jingdon u Bah Sosthenes Sohtun, la sakhi ruh da ka jingdon Bah R. Shadap, DSEO, u Bah P. Mawblei, Rangbah Shnong Warmawsaw, u Babu B.C Doloi, Principal ka Warmawsaw HSS Arts Stream, ki reiw rangbah ka thain, ki khynnah skul lem bad kiwei.
Haba kren ha katei ka sngi, u Bah Sosthenes Sohtun, u la pynpaw ia ka jingkmen ba ka Warmawsaw HSS ka la lah ban buh ia ka Arts Stream, namar kan pynsuk ia ki samla na katei ka thain, ba kin bteng ia ka jingpule ka jong ki.
Kum u MLA bad Myntri Sorkar, u Bah Sosthenes Sohtun, u la ai ka jingkular ba un sa iakren bad ki Managing Committee, na bynta ban pynbha shuh shuh ia ka Warmawsaw HSS Arts Stream bad khamtam eh haba iadei bad tulop na bynta ki nonghikai kiba hikai ha katei ka jaka pule, u la bynrap.
Sa peit ruh