Nongpoh, Naitung 1: Ka Tnad Cooperation jong ka Sorkar Meghalaya mynta ka sngi ka la pynlong ïa ka prokram plie paidbah ïa ka Cooperative Week 2026 ha Prime Hub, Umdihar, Ri Bhoi District, ha kaba la wan ban plie paidbah da u Myntri ka Tnad Cooperation ka Sorkar Jylla, u Bah Methodius Dkhar, kum u Kongsan.
Ka jingrakhe ïa kane ka Cooperative Week ka dei shi bynta ban pynkhlaiñ ïa ka jingdon bynta jong ki Cooperative Society ha kaba ïadei ban kyntiew ïa ka ioh ka kot bad ka jingpynroi ïa ki kam shakri paidbah lyngba ka rukom treikam jong ki Cooperative.
Ha kane ka sngi, nalor u Myntri ka Tnad Cooperation, la wan ban ïashim bynta lang da u MLA ka Nongpoh u Bah Mayralborn Syiem, u MLA ka Umsning u Dr. C. Lyngdoh, u Rangbah Shnong Umdihar u Bah Romel Lyngdoh, ryngkat ka jingdonlang ki heh sorkar na ka jylla bad na ka district, lem bad ki nongmihkhmat na ki Cooperative Society bapher bapher.
Ha kane ka prokram la pynlait paidbah ruh ïa ka eNewsletter bad RCS Office Portal jong ka tnad, ban wanrah ïa ka rukom treikam kaba kham sted, kaba shai bad kaba ïadei bad ka juk mynta.
Ha kane ka sngi la pynkup burom ruh ïa ki Cooperative Societies kiba la leh bha ha ki kam jong ki, nalor ka jingpynlong ïa ka Health Camp bad ka jingjurip ïa ki stall jong ki Cooperative Society kiba ïashim bynta ha kane ka prokram.
Sa peit ruh
