Ka Hynniewtrep Youth Council, Ri-Bhoi District haka jingïalam u Samla Hercules Suting President bad u Samla Tony Shylla General Secretary lem bad ki dkhot, mynta ka sngi kala leit ban khynra ïaka karkhana jri bala tip kum ka Resource Rubber Pvt. Ltd kaba don haka shnong Mawsmai 11 mer ha Ri-Bhoi District hadien ba ka seng kala ioh jingtip bad kynnoh ba katei ka karkhana pynmih jri ka dei kaba la shu pynïaid beaiñ khlem ki kot ki sla ba biang bad shongwai haka jaka jong u Bah Donald Rymbai.
Kaba sngewlyngngnoh ka long ba ha katei ka jingleit jong ka seng HYC bad pan ruh ïa ki kot ki sla jong katei ka karkhana naduh ka trading license utei u bar jylla u la pynibor pynban ïaki dkhot jong ka seng bad pyneh triang bad sei ruh da ka jingkren jong u Conrad Sangma u la ba kren ba ym donkam work Permit haka jylla Meghalaya bad kim don hok ban leit pan ïaki kot ki sla khlem da ioh jingbit naka sorkar.
Ka jingkren heh jong u bar jylla ha kum katei ka por kala pynbitar ïaki dkhot ka seng kiba la leit ban pan da ka lynti kaba jai jai bad mih ruh ka jingïañia kaba jur bad pynibor mar kylliang.
Shuh shuh hadien ka jingpynibor jong u trai katei ka karkhana naka liang ka seng kala leit ruh ban khang tala ïa katei ka karkhana bad byrngem ruh ba kim dei ban plie katba kim pat lah ban pynbiang ïaki kot ki sla bad ki jingdonkam baroh.
Haba kren sha ki lad pathai khubor naka liang u Samla Tony Shylla u la ong b akum ka seng ka dap da ka jingsngewkhia hadien ba kila leit da ka lynti ban pan ïaki kot ki sla kumba ka seng kala ioh jingtip ba katei ka karkhana la shu pynïaid beaiñ pynban u trai katei ka karkhana u la pynibor pynban sha ki nongïalam ka seng ba um salia bad kim dei ban wan pan ïaki kot ki sla khlem da ioh jingbit naka sorkar bad khein dewthala ïaka jingwan mih jong ka seng.
U la ong ruh ba dei hadien ka jingpynibor jong utei u bar jylla uba la thmu ruh ban kynrup ïaki dkhot ka seng, kum ki nongïalam kim banse ban phah khang tala syndon ïa katei ka karkhana.
Naka liang U Bah Donald Rymbai kum u trai jong katei ka jaka u la ïathuh, naduh u snem 2022 u la ai wai ïa katei ka jaka naka bynta ban pynïaid ïa katei ka karkhana bad haduh mynta u trai jong katei ka Karkhana um shem la siew ïaka bai wai jaka bad naka liang u trai jaka um shym la kwah ban thoh ruh ïaka sorkular hapdeng jong ki ha kaba ïadei bad ka jingaiwai jaka.
Shuh shuh u la ïathuh ba naka liang jong u kum u trai jong ka jaka u la dep ruh ban ujor ïa kane ka jingleh jong utei u trai jaka sha ki bor pynïaid District naduh u snem ba la leit hynrei haduh mynta kam shym la don kano kano ka jingshim khia naka liang ki bor district.
U Bah Donald u la ïathuh ba dei halor kane ka jingleh donbor jong da u trai jong ka Karkhana kaba la pynlong ïa u ban leit pan jingïarap naka kynhun seng bhalang ka HYC ban ïarap ban tuklar ïa kane ka kam namar kum u trai jaka u kam ruh ba u don ïaki kot ki sla kiba biang ban pynshisha ba u la dep thied ïa katei ka jaka bad ai wai sha katei ka kompani pynmih jri.
