Nongpoh, Nailar 02: Kum kawei na ka thong ban ai mynsiem bad ban kyrshan ia ki samla kiba ieng hala ki jong ki kjat ha liang ka seng kam seng jam ha ki kam bapher bapher, ka Nongpoh Town Shopping Complex ryngkat ka jingiatrei lang bad ka G&C Store ka la rai ba pynlong da kawei ka tamasa ia die ia thied ba la tip kum ka .Nongpoh Shopping Carnival’ ha Nongpoh Town Shopping Complex.
Kane ka tamasa kan sdang naduh ka 13 tarik u Nailar 2025 haduh ka 16 tarik u Nailar 2025 ka ban sdang naduh ka por 10 baje mynstep bad haduh 7.30 baje janmiet.
Na ka liang ki bor pyniaid katei ka Nongpoh Shopping Carnival, ki la khot la wer ia baroh ki paidbah ka Ri Bhoi bad na ka jylla ban ia wan ha katei ka tamasa ia die ia thied, kaba long kum ka jingai mynsiem ia ki khun samla ka dong bad ka thaiñ kiba pyrshang ban ieng ha la ki jong ki kjat ha ka liang ka seng kam seng jam lade.
Kumba la pynpaw da u deputy Commissioner ka Ri Bhoi, u Abhilash Baranwal bad u nongpyniaid katei ka Tamasa, la ong ba kane ka dei ka sien kaba nyngkong eh ban pynlong ia kane ka tamasa ha katei ka Shopping Complex bad ka thong kaba hakhmat ka long ban iarap ne kyrshan ia kito ki nongshong dukan bad ki samla ne ki nongshong shnong kiba buh dukan ha katei ka Shopping Complex.
