Nongpoh, Lber 03: Ka Synjuk ki Rangbah Shnong Rud Wah Umpli ha Ri Bhoi District ba hap ha ki 2 tylli ki Constituency kata ha Nongpoh Constituency bad Jirang Constituency mynta ka sngi ki la leit ban kynduh ia u Deputy Commissioner ka Ri Bhoi u Abhilash Baranwal bad aiti ruh da ka dorkhas ban ujor halor ka jingbym hun ia ka rukom siang rong ia ki ar tylli ki surok ba pyniasoh ia bun tylli ki shnong.

Kine ki 2 tylli ki surok ba ka Synjuk ki rangbah shnong ha ryngkat ki paidbah nongshong shnong kim hun satia ia ka rukom siang rong bad ka jingpyntrei ia ka kam ka dei ka surok ba pyniasoh na Umden sha Byrnihat kaba don 38.7 km jingjngai bad kawei pat ka surok na 20mer sha Umdap kaba don 5km ka jingjngai.

Kine ki ar tylli ki surok ki dei kiba la mang lyngba ka skhim PMGSY ha kaba ia ka surok na Umden sha Byrnihat la pyntrei da ka MP Agarwal Company Limited bad ka surok na 20mer sha Umdap pat la pyntrei da Bah Sunshine Sawkmie kum u Contractor.

Haba kren sha ki lad pathai khubor mynta ka sngi hadien ka jingiakynduh ia u Deputy Commissioner ka Ri Bhoi, u Bah Arul Makri Secretary katei ka synjuk ki Rangbah Shnong bad u Bah Anjelus Maring Rangbah Shnong ka Umdapdumu, ki la ong ba kum ki nongialam shnong bad wat ki paidbah ruh kim hun satia ia ka jingsiang rong ia kitei ki 2 tylli ki surok, namar kumba la lap da ki paidbah ka don ka jingpyntrei torti kaba pynduh jingkyrmen pynban iaki paidbah wat lada ki la ioh ia ka surok rong kaba la mang tyngka da ka sorkar.

Ki la iathuh ruh ba ki la dep ai da ka dorkhas sha u Deputy Commissioner bad ki la kyrpad ruh ia u ba un shim khia lem ia kane ka kam ban ia kren sha ki bor kiba halor ka sorkar, namar lada ailad ban trei torti ia ka surok ka jingduhnong kaba khraw ka dei ia ki paidbah nongshong shnong kitei ki thain.

Ki la ong ruh kumba la lap da ki nongialam bad ki paidbah tang shu dep siang rong ia kitei ki surok ka la don ki jaka ba la sniew biang bad ki hap ban maramot biang tang hadien 2 ne lai sngi bad kane ka paw shai ba ka don ka jingpyntrei toriti ha kaba siang rong ia ki surok.

Ki la ong ruh kum ki nongialam shnong bad ki paidbah nongshong shnong ki kmen bad ki ai khublei ia ka sorkar kaba la ai da ka surok rong kaba paka, ba mynta palat 20 snem ki jynjar haka leit ka wan na ka jingsniew ka surok, hynrei kane ka jingsiang rong bad ka jingpyntrei torti ia kitei ki surok ka la long pynban ka jingduh jingkyrmen ia ki paidbah ba kane ka surok kan julor ne duh noh tang shipor.

Namarkata, ki la iathuh ba ym tang ba ki la kyprad ia u Deputy Commissioner ban shim khia mardor halor kane ka jingpyntrei torti ia ki surok bad ki la kyrpad ruh ban don ka jingiatjurip lang ia ktiei ki surok khnang ban lap ia ka jingshisha halor ka jingpyntrei toriti ia kitei ki surok, ki la bynrap.