Shillong, K’Lyngkot 30: Ki pulit Anti-Narcotics Task Force (ANTF) jong ka East Jaintia Hills District kila ioh ban kurup haduh 45.5 gram u drok heroine ba shongdor kumba 20 lakh nad kawei ka trok tanker kaba don ïa u number AS 11 DC 1200 bad ioh kem ruh haduh 4 ngut ki briew ba suba donkti ha kane ka kam khaii drok.

Kumba la pyntip da u Superintendent of Police ka East Jaintia Hills District u Vikash Kumar u la ong ba hadien ka jingioh jingtip kaba bñiah ka kynhun ANTF kila pynlong ka jingpynap shrip ha Umkiang Police Patrol Post bad ioh bat ïa kawei ka trok tanker kaba don ïa u number AS 11 DC 1200 bala suba ba katei ka trok ka kit drok bad haka jingtalasi jong ki pulit kila lap haduh 45.5 gram u drok heroine na ki 4 tylli ki synduk sabon.

Halor kane ka jingioh kurup drok ki pulit kila kem ruh 4 ngut ki briew ba suba donkti ha katei ka kam ba kynthup ïa u Shymal Boro, Matab Uddin, Ataur Rohman bad u Biren Singha kiba dei naka jylla Assam bad kurup ruh 4 tylli ki mobile phone naka met jong ki.

Naka liang ki pulit kila register mukotduma ha Lumshnong Police Station katkum ka NDPS Act bad ka jingtohkit ïa kitei ki 4 ngut kiba la suba ruh ba dei kiba ju donkti ban shalan drok na kawei ka jylla sha kawei pat ka dang ïaid shakhmat ban lap shuh shuh ïa kiba donkti ha kum kane ka kam beaiñ.