Shillong, Nailar 07: Ki nongrep ha ryngkat ki nongialam ka Hill Farmers Union (HFU) hynne ka sngi ki la pynpaw ka jingbitar hadien ba kim shem la ioh kano kano ka jubab kaba shai ha kaba iadei bad ka jingpyntrei kam ia ka aiñ ban khang ia ka jingot kilo ia ki mar rep.
Ki nongialam ka HFU bad ki nongrep ki la pynpaw ia kane ka jingbitar kadei hadien ka jingwan iakynduh ia u Chief Executive Member (CEM) ka Khasi Hill Autonomous District Council (KHADC) u Bah Shemborlang Rynjah.
Haba kren shaki lad pathai khubor u President ka HFU u Bah Commander Shangpliang ula iathuh baka jingwan kynduh ia u CEM ka KHADC kadei ban kylli halor ka jingpyntreikam ia ka aiñ Khasi Hills Autonomous District (Establishment, Management and Control of Markets) (Second Amendment) Regulation, Act 2021, kaba la ioh jingmynjur na u Lat ka Jylla ha ka 23 tarik u Naitung 2023.
U Bah Commander ula pynpaw ia ka jingbym sngewhun halor ka jingkynduh ia u CEM daka ba kynnoh ba ki nongrep kim shym la ioh ka jubab kaba shai na u CEM ka KHADC.
“Ka jingdawa pynduh noh iaka jingot kilo kadei da kaba la slem bha bad naka por shaka por ngi la wan ud la bun sien sha ka Executive Committee (EC) hynrei kat haduh mynta hi ka EC kam shym la lah ban ai ka jubab kaba pynbun iaki nongrep” ula ong.
Ula ong ba u Lat ka jylla u la ai ka jingmynjur ia ka aiñ ban khang ia ka jingot kilo, bad ka Council ka la dep ban pynkhreh ia ki rule ban pyntreikam ia kane ka aiñ, bad la dep ban phah ruh sha ka tnad District Council Affairs (DCA) jong ka Sorkar Jylla ban ioh ia ka jingmynjur bad na ka liang u CEM u la kular ba un buddien ia kane khang ba pynsted noh ia ka jingpyntreikam ia kane ka aiñ.
Ka HFU ka la kyntu ruh ia ka District Council bad kin phah da ki enforcement bthah ia ki nongkhaii ba kim dei ban ot kilo ia ki marrep hynrei na ka liang u CEM ym shem la ai ka jubab ka ba shai halor kane da kaba kdew ba ym sa shong bishar halor kane.
