Shillong, K’lyngkot 20: U Bah Sanbor Shullai, MLA ka BJP bad uba dei u Myntri ka tnat ki kam jngohkai pyrthei ha ka sorkar jylla, ha ryngkat ka jingsynranlang ki heh nongialam ka Party BJP ha Meghalaya, hynne ka sngi, ki la leit ban kynduh ia u Gajendra Singh Shekhawat, Myntri Sorkar pdeng uba dei peit ia ka tnat ki kam jngohkai pyrthei bad ia tnat ban pynneh pynsah ia ki riti dustur.

Ha katei ka jingleit kynduh u Bah Sanbor Shullai ia utei u Myntri Sorkar pdeng ka dei hapoh ka jaka sah jong u, kaba don ha Nongbah Delhi, ha kaba lyngba katei ka jingkynduh Myntri Sorkar pdeng, u Bah Sanbor Shullai, u la ioh ban pynsngew ia shibun ki mat kiba iadei bad kumno ban kyntiew ia ki kam jngohkai pyrthei bad ba kumno yn nanglah ban pynneh pynsah ia ki riti dustur ha Meghalaya.

Nalorkata, u Bah Sanbor Shullai, u la buh  ia ka jingkyrpad sha u Myntri Sorkar pdeng ba un buh ia shibun ki jingpynmang tyngka ne ban buh shibun ki skim na sorkar kmie na bynta ka Meghalaya, kata ia ka Seng Khasi, kaba dei ka lehniam leh rukom jong ki paid Khasi, ka Seng Raid jong ki Jaintia bad ka Songsarek, kaba dei jong ki paid Garo.

Lyngba katei ka jingleit kynduh, u Bah Sanbor Shullai, u la ioh ruh ban pynsngew halor ka jingdonkam ban don noh da ka Iew tynrai ha Mawlai CRPF Camp, khnang ba kan long kum kawei na ki jaka, ka ban pynpaw pyrthei halor ka jingriewspah ki jaka shatei lam mihngi halor ka jingdon ia ki jaka kiba la don naduh ka por jong u men barim bajah.

Namrkata, u la kyrpad ia utei u Myntri Sorkar pdeng ba un wan jurip hi dalade sha kitei ki jaka, khnang ba kan kyntiew shuh shuh ia ki kam jngohkai pyrthei bad ka ban khring ia ki nongshang pyrthei ba kin wan peit ban jngoh ia ka jingriewspah ka Meghalaya halor ka jingdon ia ki jaka jngohkai pyrthei, kiba la don naduh ki por ba mynshwa, namar lyngba ka jingkiew ha ka jingdon ki jaka jngohkai kan long ruh kum kawei na ki lad ban iohkam iohjam jong ki khun samla ha ka jylla hi baroh kawei, u la bynrap.