Ki nongialam ka Khasi Students Union (KSU) sengkmie, ki la pynpaw ia ka jingbitar kaba khraw halor ka jingnang shah khot hajir ki para dkhot kiba dei ruh ki President, Secretary jong ki Circle bad Unit bapher bapher.
Lah ban kdew, ba ki nongialam ka KSU ki la nang iai bteng ban khynra ia ki mynder ri kiba wan bylla hapoh Meghalaya khlem ka work permit bad kiwei kiwei ki kot ki sla ba donkam ha kylleng ki jaka jong ka Bri u Hynñiewtrep.
Ki nongialam ka KSU ki la shah khot hajir biang ha Sadar Police Station mynta ka 15 tarik ki kynthup ia u President ka Malki Circle u samla Iashan Mukhim bad u dkhot ka Malki Circle u samla Mevian Jyrwa.
Haba kren bad ki Nongthoh Khubor, u samla Iashan Mukhim, u la Ong, ba ki pulit ki la iai khot hajir ia ki nongialam ka KSU da kaba kynnoh thamula bad phareb khlem nongrim halor ki daw bym hok, na ka liang ka seng ka pynrem jur ia kane ka jingleh jong ki pulit ka jylla Meghalaya.
“Ngin nym kynran dien ne tieng ne smiej ia ka jingpyrshah pynduh mynsiem ki pulit, hynrei ka seng kaba ieng halor ka nongrim ban thwet naphang ia ki mynder ri kiba wan trei bylla khlem ka work permit bad kiwei kiwei ki kot ki sla hapoh ka Bri u Hynñiewtrep kan iai bteng kumba la rai”, ong u samla Mukhim.
La synranlang ia ki nongialam ba shah khot hajir ne summon da u Samla Donald Thabah General Secretary ka KSU Sengkmie bad kiwei kiwei ki nongialam ba hakhmat ka KSU.
