Shillong, Jylliew 17:
Ki shipai jongka Border Security Force (BSF) kiba pahara ia ka khappud jong ka India bad Bangladesh da ka jingiatreilang bad ki bor pulit ka jylla, hynnin ka sngi ki la ioh ban kurup haduh 19000 hajar kilo ka shini kaba la thmu ban shalan beain sha ka ri Bangladesh lyngba ka shnong Rongra jong ka South West Garo Hills District.
Ia katei ka shini kaba la ioh kurup na katei ka shnong Rongra kaba dei ka shnong khappud bad ka ri Bangladesh, ki shipai BSF jong ka 200 Bn ryngkat bad ki pulit ka jylla, ki la ioh ban kurup na kawei ka ingjah kaba don ha syndah jong u khappud lane ka International Border ha ka jingleit khynra hadien ka jingioh jingtip kaba thikna ia ka jingdon ki kam shalan beain ha kitei ki jaka.
Ki shipai BSF ha ryngkat bad ki pulit ka jylla hadien ka jingioh kurup ia katei ka shini ha ka jingleit khynra, ki la pynkit noh bad aiti noh sha ki pulit ka Rongra Police Station na ka bynta ban leh bad pyndep ia ki jingdonkam katkum ki kyndon jong ka ain.
