Shillong, Risaw 16: U Myntri rangbah ka jylla u Conrad K. Sangma mynta ka sngi u la pdiang burom ia u Vice President ka ri India u Jagdeep Dhankhar hadien ba u la wan poi mynta ka sngi ha Nongbah Shillong.
Ha kane ka jingpdiang burom ia u Vice President ka ri, nalor u myntri rangbah ka jylla u Conrad K. Sangma la sakhi lang ruh da ka jingdon lang ka Myntri sorkar ka Dr. Ampareen Lyngdoh, u MP ka Rajya Sabha u Dr. W. Kharlukhi, u Chief Secretary ka jylla u Bah D.P Wahlang bad kiwei.
Kane ka jingpdiang burom u myntri rangbah ka jylla, ka dei ruh hadien ba u Vice President ka ri, u Jagdeep Dhankhar u la wan poi ha Nongbah Shillong kaba u la wan lyngba ka ka Helicopter kaba u la hiar ha Eastern Air Command, Shillong.
Kum ban pynkynmaw, kane ka jingwan iuh kjat u Vice President ka ri, mynta ka sngi u sa leit ruh ban buh ia u Mawnongrim jong ka Meghalaya Innovation Hub ha New Shillong, nalor kiwei kiwei ki kam kiba u la ban peit kyrpang ia ka jinglong jingman ka jylla Meghalaya.
