Shillong, Nailar: U Superintendent of Police (SP) ka East Khasi Hills, u Bah Vivek Syiem u la pyntip ba ka tnat Pulit ka la pynkhreh bha ïa ki jingpynbeit bad ki bor pahara ha kaba ïadei bad ka jingrakhe ïa ka Independence Day kaba 80 snem hapoh ka District baroh kawei.
U Bah Vivek ula pyntip ba ka tnat Pulit kan pynthikna ba ka jingrakhe sngi laitluid ka ri India kan dei ka sngi kaba shngaiñ bad kaba khlem kano kano ka jingjia ne ka jingshah pynwit.
Haba kren shaki lad pathai khubor u Bah Vivek ula ong ba ha Polo kan long kawei na ki jingrakhe ba heh tam ha ka Jylla, ha kaba yn pynlong ïa ka jingpynher lama bad ka jingïaid parade.
Ula iathuh ba kin don ruh 2 tylli ki program ba heh haki 2 tylli ki Sub-Division kata ha Sohra bad Pynursla.
“Ki bor Pulit ka East Khasi Hills ka la buh ïa ki bor pahara ha kiba bun ki jaka, khamtam ha ki jaka kiba lah ban don jingma. Ki Pulit kila long kiba la pynkhreh bad kan trei shitom ban pynthikna ba ka jingrakhe sngi laitluid (Independence Day) kan long kaba suk” la ong u Bah Vivek.
U SP ula iathuh ruh ba ka tnat Pulit kala pynkhreh ruh iaki bor pahara kyrpang (Additional Forces) ban ioh pyndonkam, lada donkam ha kano kano ka por.
U la pyntip ba ka tnat Pulit ka ju pyndonkam daki Drone ha ki prokram kiba heh, bad ha kine ki sngi ruh yn pyndonkam ïa ki drone ban peitngor bad syntiat ïa ki jaka bapher bapher.
Peit ruh:
