Delhi, Jymmang 31: Ka Khasi Student Union, Delhi Unit kala ioh ban pynlait bad ïarap ïa arngut ki samla kynthei na Barato, Meghalaya, hadien ba ki la kynnoh ba la pynbiej ïa ki da ka jingkular ban pynïohkam ha Delhi hynrei hadien pat la pyrshang ban pynrung ïa ki ha ki kam khaïi met.
Katkum ka jingïathuh jong kitei ki samla kynthei, la wanrah ïa ki sha Delhi da kawei ka kynthei kaba la kular ban pynïohkam ïa ki ha kawei ka hotel. Hynrei, hadien ba ki la poi ha nongbah Delhi, la kynnoh ba la pynbor ïa ki ban rung ha ki kam khaïi met. Haba ki la kyntait ban kohnguh ïa katei ka kam, katei ka kynthei ka la dawa ba kin siew biang ïa baroh ka pisa ba la pynlut ha ka jingleit jong ki bad ka la knieh ruh ïa ki mobile phone jong ki.
Ki samla kynthei ki la kynnoh ruh ba ym shah satia ïa ki ban mih na katei ka jaka tad haduh ba kin da siew biang ïa ka pisa ba la pynlut na ka bynta jong ki.
Hadien ba ka KSU Delhi Unit ka la ïoh pdiang ïa ka jingpan jingïarap na kine ki arngut, mar mar ka seng ka la pyntip sha ki pulit Delhi bad ban tuklar ha katei ka kam. Ki Pulit Delhi ki la shimkhia ïa ka jingujor bad ki la bat ïa katei ka kynthei kaba kular ai kam na ka bynta ban pynlong ïa ka jingtohkit kaba bniah.
Haka jingtohkit, katei ka kynthei ka la kyntait ïa baroh ki jingshah kynnoh. Ka la kam ba kine ki arngut ki samla kynthei ki la wan hi da ka mon sngewbha lajong sha Delhi ban wad kam, bad ba ka la siew ïa ka bai leit bai wan jong ki tang kum ka jingïarap. Ka la kyntait ruh ba ka don bynta ha kano kano ka jingthmu ban pynrung ïa ki ha ki kam khaïi met.
Lyngba ka jinglam lynti jong ki Pulit Delhi, la bthah ïa katei ka kynthei ba kan pynphai noh ïa ki mobile phone jong kitei ki samla kynthei.
Katkum ka jingïathuh jong ka seng, kine ki arngut ki dang don mynta hapoh ka jingïada jong ka KSU Delhi Unit katba dang pynbeit ïa ki lad jingïarap ban pynpoi suk ïa ki sha Meghalaya. La ïathuh ruh ba ki bahaïing hasem jong kawei na ki, ki la phah ïa ka pisa ban siew ïa ka tiket liengsuiñ jong ka ban leit phai noh lashai ka sngi.
Ka KSU Delhi Unit ka la pynpaw ba kan ïai bteng ban peitngor bad jingïada ïa ki samla bad ki nongshong shnong na Meghalaya kiba leit pule, trei ne sah shabar ka jylla. Ka seng ka la kyntu ruh ïa baroh kiba wad kam ba kin long kiba husiar bha haba pdiang ïa kino kino ki jingkular kam na ki briew bym lah ban shaniah, bad ba kin pynshisha bha ïa ki jingtip baroh shuwa ban shim rai ban leit sha kiwei pat ki jylla lane nongbah.
Also Watch