Yn iaid paidbah ka Congress ha Shillong ban pyrshah ia ka jingpynkylla ka BJP ia ka FCRA

Shillong, Nailar 07: Ka Meghalaya Pradesh Congress Committee (MPCC) hynne ka sngi kala pynbna ban pynlong daka jingiakhih daka ba iaid kjat na Laitumkhrah Madan Fire Bridge shaduh sha Don Bosco Square ban pynpaw ka jingpyrshah iaka jingthmu ka Sorkar Pdeng ba ialam daka Bharatiya Janata Party (BJP) ban wanrah jingpynkylla haka Foreign Contribution Regulation Act (FCRA).

Ka jingiaid paidbah jong ka MPCC kan dei haka 10 tarik Nailar naduh ka por 11 baje mynstep bad ka Party ka iawer ia baroh ki nong shong shnong ka Jylla Meghalaya ban wan ïashim bynta ban pynpaw iaka jingsngewkhia lada wanrah ka jingpynkylla haka FCRA.

Haba kren shaki lad pathai khubor u President ka Laitumkhrah Block Congress Committee u Bah Eugene Jarain ula ong ba kane ka jingiaid kjat daka ba jai jai kam dei ka jingiakhih ban thmu pynlong polticis hynrei kadei ka jingsngewkhia jong baroh ki nong shong shnong ka Meghalaya khamtam kaba dei ka Jylla kaba bun tam ki kynhun niam kiba shakri iaki nong shong shnong bad iaka imlang sahlang.

Pule ruh: Ther U Bah Ardent Ia Kam Leh Donbor Ka Sorkar MDA Kynthup Ka Public Hearing Ka Shree Cement

U la ong ba ka jingthmu ka Sorkar National Democratic Alliance (NDA) ba ialam daka BJP ban wanrah jingkylla haka FCRA kan ktah bha iaka Meghalaya bad iaka thain Shathei Lammihngi (North East) namar kadei ka thain kaba ioh jingkyrkhu naka jingwan ai jingshakri ki kynhun niam bakher bapher.

“Ka Meghalaya bad ka thain Shathei Lammihngi ka don bun bah ki skul bad ki jaka sumar bala seng daki kynhun niam bad kane ka jingthmu ka BJP ban wanrah jingkylla haka FCRA kan pynduh nong ia kum kita ki shlem ai jingshakri iaka imlang sahlang baroh kawei” la ong u Bah Eugene.

Sa peit ruh:

U Bah Eugene ula kyntu iaki nong shong shnong ka Meghalaya ban wad bniah halor ka FCRA khnang ba kin sngewthuh balei ka Congress naduh ki sngi nyngkong ka pyrshah jur iaka jingthmu ka BJP ban wanrah jingkylla.

“Ka jingiakhih daka ba iaid kjat kam dei eh ka mat sain hima sima hynrei kadei ban pynpaw iaka jingsngewkhia halor ka jingthmu iuhroit ka BJP iaki kynhun niam kiba ai ka jingshakri iaka imlang sahlang hapoh ka Jylla bad ka ri baroh kawei” ula ong.