U Symbut Myntri Rangbah ba khmih iaka tnat Urban Affairs u Bah Sniawbhalang Dhar u la kular hapoh ka iingdorbar ban bthah iaki ophisar ka tnat ban leh daka ba tyngeh iaki ba pynlong jaka thad jain haki jingker (Railing) kiba don hapoh ka thain Khyndai Lad.
Ia kane u Bah Sniawbhalang u la kular haba jubab iaka jingkylli ba wanrah da u MLA ka VPP na North Shillong Constitution u Bah Adelbert Nongrum mynta ka sngi ha ka Dorbar Synrai ha ïing dorbar thaw ain ka jylla.
U Bah Sniawbhalang u la pyntip ba haduh mynta ka tnat kam pat ioh pdiang kano kano ka jingujor haba iadei bad ka jingpyndonkam jaka thad jain daki briew iaki Railing ba ker iaka surok ha Khyndai Lad.
“Hoid ka Sorkar ruh ka sngewkhia halor kane ka jingleh ki briew hynrei haduh mynta ka Sorkar kam pat ioh pdiang ki jingujor halor kane. Watla katta ruh naduh lashai ngan bthah iaki ophisar ka tnat ban leh daka tyngeh lada lap iaki briew ba thad jain haki nar ba ker iaka surok ha Khyndai Lad” la ong u Bah Sniawbhalang.
Hashuwa kane u Bah Adelbert u la ong ba kane ka jingthad jain haki jingker ha Khyndai Lad ka pynjah burom iaka Jylla, namar ka Khyndai Lad kadei ka jaka ba ki briew na bar ka Jylla ki ju poi bha bad kaba log ruh ka iew pdeng hapoh ka jylla.
