Kum shibynta ban pynkhreh ïaka jingïaseng bah ki Rangbah Shillong Archdiocese, u MLA ka Nongpoh u Bah Mayral Born Syiem ryngkat u Fr Peter Syiemlieh Parish Priest, haka jingdonlang ki nongïalam shnong, ki Rangbah Balang jong ka Nongpoh Parish lem bad ki ophisar ka tnad PWD mynta ka sngi kila leit ban jurip ïaki sawdong sawkun jong ka Nongpoh Parish, ban pyndep ïa bun ki kam pynroi naduh ki jingker kynroh, ki lynti ki syngkien bad kiwei kiwei ki kam pynroi shuwa ka jingpdiang ïaka jingïaseng bah jong ki Rangbah ka Shillong Archdiocese ha Nongpoh Parish ban long ha u snem 2026 bad kumjuh ruh ka platinum jubilee ha u snem 2027.

Haba kren sha ki lad pathai khubor hadien ka jingjurip naka liang u MLA ka Nongpoh u Bah Mayral Born Syiem u la ong ba kane jingjurip ha kane ka sngi ka long ban pynthikna ïa shibun ki jingdonkam ha kaba iadei bad ki kam pynroi yn lah ban trei bad pyndep haka por ba biang shuwa ka jingpdiang ïa katei ka jingïaseng bah jong ki Rangbah khnang ba katei ka jingiaseng kan long kaba ïaid beit ïaid ryntih.

U la ong ruh bun ki kam kila sdang mynta bad shen yn sdang ruh ka jingpynheh ïa u surok naduh lad Mawroh ban rung sha parish bad kum u MLA u la ai ruh ka jingkhublei ba kyrpang ïaka sorkar khamtam ïa u symbud Myntri Rangbah ka jylla u Bah Prestone Tynsong u ba la pdiang ïaka jingkyrpad ba ki kam pynroi kin ïaid beit ïaid ryntih.