DAWA BAI LUT KSAN KA SHNONG NAKA MEECL IAKI 3 NGUT KI KHYNNAH BA KHLAD SHAH BAT BORDING ILEKTRIK
Nongpoh, Naitung 16: Halor ka jingkhlad noh ki 3 ngut ki khynnah rit ha ka shnong Umtangling ba hap ha Umiam Police Station na ka jingshah bat ha ka bording ilektrik jong u snai 11 kv hynnin ka sngi, ka Shnong Umtangling ka la dawa syndon na ka tnad MeECl ba ka dei ban siew ia ka bai lutksan na ka bynta ka longïing jong kitei ki 3 ngut ki khynnah rit kiba la duh noh ia la ka jingim khlem poi pyrkhat.
Kum ban pynkynmaw, hynnin ka sngi ha ka por 2 baje ei ei, kitei ki khynah rit ki dang iaid lynti hajan ka surok shnong bad khlem poi pyrkhat ki la shah bat ha ka bording ilektrik kaba khlain bor haduh ba la duh syndon ia la ka jingim, na ka daw ka jingbym tip ia ka jinghap u sainar 11kv ha ki bynt jong ka surok shnong.
Pule ruh:Pynher syrngiew ka Pla ba suba don bom ba wan buh ha Khyndailad
Kitei ki khynnah rit kiba la duh noh ia la ka jingim la tip kyrteng kum u John Paul Nonglang 13 snem ka rta, u Hamepynshai Nonglang 11 snem ka rta bad u Prainingstar Mawlong 15 snem ka rta bad 2 ngut napdeng jong ki, ki dei shi para.
Haba ia kren mynta ka sngi bad u Secretary Shnong ka Shnong Umtangling u Bah B. Lyngdoh u la ong ba ka Shnong ka dap shisha da ka jingsngewsih kthang kaba jur ha kaba haduh 3 ngut ki mynsiem ba kordor ki la duh noh ia la ka jingim na ka jingshah bat bording ilektrik bad kum kane ka jingjia kam pat ju jia koit ha katei ka shnong.
U la ong ruh ba na ka liang ka shnong ka phah ruh ka khubor sngewlem sha ki longïing jong kitei ki khynnah rit kiba la duh ia laka jingim ba u Blei un ai ia ka jingpyntngen ha kum kane ka por ba ki mat ia ka jingsngewsih kthang hapoh ka ing ka sem.
Sa peit ruh:
Ha kawei ka bynta, u la ong ba na ka liang ka shnong ka dawa na ka tnad MeECL ba ki dei ban siew bai lutksan sha ki longïing jong kitei ki khynnah bad ka kyrpad jur ruh ba ka tnad MeECL ka dei ban peitngor nangne shakhmat bad kum kine ki jingjia ba sngewsih kiba ktah shisha ia ka shnong ka thaw bad ka ing ka sem kan nym dei shuh ban dang jia, u la bynrap.
Shuh shuh, u la iathuh ruh ba ka bor shnong shuwa ban jia kine ki jingjia ba sngewsih haduh 3 ngut ki mynsiem ba kordor ki la duh ia la ka jingim, na ka liang ka shnong ka la dep ban leit ujor la bunsien sha ka tnad MeECL halor ka jingsynjor ki sanar ilektrik, ka jingduh u transformer hapoh ka shnong ba ki hap ban shong dum, hynrei ka tnad MeECL kam shym la shim khia saita bad kum ka shnong ka dawa ba dei ban siew bai lutksan sha kitei ki longing kiba la duh noh haduh 3 ngut ki mynsiem ba kordor, u la bynrap shuh shuh.
