U Bhaichung Bhutia, uba dei ruh u kapten barim ka kynhun ialehkai phutbol ka ri, u la pynbna ialade ba u la iehnoh na ka jinglong kum u dkhot ka Technical Committee, ka kynhun ba kyrpang ka ban peit ia ki kam ban kyntiew ia ki kam ialehkai phutbol ha ka ri lyngba ka All India Football Federation (AIFF).
Ka daw kaba la pynlong ia u Bhaichung Bhutia, ba un weng noh ialade na ka jinglong kum u dkhot ne ban hiar noh na ka shuki kaba u don ha ka Technical Committee, ka dei ba u sngewpyrshah ia ka rai jong ka AIFF, ba ka la thung ia u Manolo Marquez ba un long kum u Coach ne u nonghikai ia ka kynhun ialehkai phutbol ka ri.
U Bhaichung Bhutia, u la kynnoh ba ia u Manolo Marquez, la thung kum u coach jong ka kynhun ialehkai ka Ri India, khlem jingbit bad khlem ia ka jingiasyllok lang bad ki dkhot kiba don ha ka Technical Committee bad kaba long pyrshah ia ki kyndon treikam ba la buh.
